نیہا راجپوت اور شہباز تاثیر رشتہ ازدواج میں منسلک ہوگئے، تصاویر وائرل

ہفتہ 25 ستمبر 2021 11:45

کراچی (اُردو پوائنٹ اخبارتازہ ترین - این این آئی۔ 25 ستمبر2021ء) ماڈل نیہا راجپوت اور سابق گورنر پنجاب مقتول سلمان تاثیر کے بیٹے شہباز تاثیر شادی کے بندھن میں بندھ گئے۔ دونوں کا نکاح 24 ستمبر کو ہوا جس کی ویڈیوز اور تصاویر سوشل میڈیا پر وائرل ہورہی ہیں۔شادی کی تقریب میں شہباز تاثیر نے سفید کرتا پاجامہ کے ساتھ ویسٹ کوٹ پہنا جبکہ نیہا راجپوت نے گرے رنگ کا دیدہ زیب عروسی زیب تن کیا۔

شادی کی تقریب میں اہلخانہ، قریبی دوست اور رشتے دار شریک ہوئے۔نیہا راجپوت اور سلمان تاثیر کی شادی کے حوالے سے گزشتہ ایک ہفتے سے چہ مگوئیاں تھی اور گزشتہ روز انہوں نے اپنی مایوں کی ویڈیوز اور تصاویر شیئر کرکے ان کی تصدیق کی تھی۔نیہا راجپوت اور شہباز تاثیر کے درمیان گزشتہ چند ماہ سے تعلقات تھے اور رواں برس مئی میں دونوں کو میڈیا کے سامنے بھی سرعام ملتے دیکھا گیا اور اسی وقت سے ہی ان کی شادی کی چہ مگوئیاں شروع ہوئی تھیں۔

(جاری ہے)

نیہا راجپوت نے 2016 میں اداکاری کا آغاز کیا، اس سے قبل وہ ماڈلنگ کرتی تھیں، ان کی پرورش یورپی ملک یوکرین میں ہوئی ہے، کیونکہ ان کی والدہ کا تعلق وہیں سے ہے۔نیہا راجپوت کے والد کا تعلق لاہور سے ہے اور انہوں نے پاکستان منتقل ہونے کے بعد وہیں سے ماڈلنگ و اداکاری کا آغاز کیا۔شہباز تاثیر کی یہ دوسری شادی ہے، اس سے قبل انہوں نے فیشن ڈیزائنر ماہین غنی سے 2010 میں شادی کی تھی اور ان کا ایک بیٹا بھی ہے۔