شاہد آفریدی کوئٹہ گلیڈی ایٹرز کا حصہ بن گئے

ٹیم کے ہیڈ کوچ اینڈی فلاور بھی ڈرافٹ میں شرکت کیلئے لاہور آئیں گے

ذیشان مہتاب جمعرات 9 دسمبر 2021 11:52

شاہد آفریدی کوئٹہ گلیڈی ایٹرز کا حصہ بن گئے

لاہور (اردو پوائنٹ تازہ ترین اخبار ۔ 9 دسمبر 2021ء ) قومی ٹیم کے سابق کپتان شاہد آفریدی اور جیمز ونس پی ایس ایل7میں کوئٹہ گلیڈی ایٹرز کی نمائندگی کریں گے، ملتان سلطانز کی دونوں کے حوالے سے ٹریڈنگ ہوگئی اور اب اسے کوئٹہ کی ڈرافٹ میں چند باریاں مل جائیں گی۔ پی ایس ایل 7 کا پلیئرز ڈرافٹ اتوار کو لاہور میں ہوگا تاہم اس سے قبل فرنچائزز ٹریڈنگ اور ریٹینشن پر کام کر رہی ہیں، شاہد آفریدی کے حوالے سے کافی عرصے سے یہ اطلاعات زیر گردش تھیں کہ وہ کوئٹہ گلیڈی ایٹرز کی نمائندگی کریں گے اور اب اس کی تصدیق بھی ہو گئی ہے۔

ذرائع نے بتایا کہ ملتان سلطانز نے شاہد آفریدی سمیت جیمز ونس کی کوئٹہ گلیڈی ایٹرز کے ساتھ ٹریڈنگ کر لی، اب ڈرافٹ میں کوئٹہ کی چند باریاں ملتان سلطانز کو مل جائیں گی، دفاعی چیمپئن ٹیم کے مالک عالمگیر ترین کی خواہش تھی کہ شاہد آفریدی اس سال بھی ٹیم میں برقرار رہیں، ان کے ساتھ ساتھ کوئٹہ گلیڈی ایٹرز کے اونر ندیم عمر بھی چاہتے تھے کہ آل راؤنڈر کیریئر کی آخری پی ایس ایل میں کوئٹہ کی شرٹ زیب تن کریں، آفریدی کے دونوں ہی سے اچھے تعلقات ہیں اس لیے فرنچائزز کی باہمی بات چیت میں ٹریڈنگ پر اتفاق ہوگیا۔

(جاری ہے)