نظام بدلنے کے لئے نوجوان قیادت سامنے لائی جائے،عمیر انجم

کراچی (اُردو پوائنٹ اخبارتازہ ترین - این این آئی۔ 26 مئی2022ء) قومی اسمبلی کے حلقہ این اے 240سے آزاد امیدوار معروف شاعر و صحافی عمیر علی انجم نے کہا ہے کہ کراچی کوبدلنا ہے تو چہرے بدلنا ہوں گے نظام بدلنے کے لئے شہر بھر سے نوجوان قیادت سامنے لائی جائے۔مہاجر نام پر سیاست کرنے والوں کو ہجرت کرنے والوں کے دکھ کا علم ہی نہیں۔وہ جمعرات کو لانڈھی چراغ ہوٹل پر کارنر میٹنگ سے خطاب کررہے تھے ۔

عمیر علی انجم نے کہا کہ لانڈھی کورنگی سمیت پورے کراچی کے عوام اب چہرے بدلنا چاہتے ہیں۔مہاجر نام پر سیاست کرنے والوں کو ہجرت کرنے والوں کے دکھ کا علم ہی نہیں۔مہاجر آج بھی در در کی ٹھوکریں کھا رہے ہیں لیکن اس نام پر بننے والے دھڑے اپنے مزے لوٹ رہے ہیں۔انہوںنے کہا کہ کراچی کسی فرد یا جماعت کی میراث نہیں بلکہ ہر زبان ہر مسلک اور فرقے سے تعلق رکھنے والوں کا گھر ہے۔

(جاری ہے)

ہمیں مل جل کر کراچی کو بنانا ہے، احتجاجی سیاست اور جھوٹے دعوے اب اثر نہیں رکھتے عملی کام کرنا ہوگا۔عمیر علی انجم نے کہا کہ مقامی حکومت کا کراچی کی تباہی یا ترقی سے کوئی تعلق نہیں وہ اس شہر کو دبئی کی طرح لیتے ہیں یہاں کی مقامی جماعتوں کے لوگ جب اس کی تباہی کونہیں جانتے تو کسی دوسرے کااس سے کیاغرض ہے۔کراچی کی ترقی کے لیے یہاں کے انجینئر، ڈاکٹرز، دانشوروں اور قلمکاروں سمیت بیورکریسی کوسرجوڑ کربیٹھنا ہوگا۔کورنگی کے عوام اپنا ووٹ درست سمت میں استعمال کرکے سیاسی مداریوں کو پیغام دیں کہ وہ کراچی سے محبت کرتے ہیں۔