چین کی امریکی اسپیکر پیلوسی کے دورہ تائیوان اور امریکی اقدام پر کڑی تنقید

پیر 8 اگست 2022 18:11

بیجنگ (اُردو پوائنٹ اخبارتازہ ترین - آن لائن۔ 08 اگست2022ء) چین کے ریاستی کونسلر اور وزیر خارجہ وانگ ای نے دورہ بنگلہ دیش کے دوران کہا کہ نینسی پیلوسی کے چین کے علاقے تائیوان کے دورے سے امریکہ کی تین غلطیاں سامنے آئی ہیں۔اول تو یہ چین کے اندرونی معاملات میں صریح مداخلت ہے۔ دوسرا یہ "تائیوان کی علیحدگی" کی حمایت کرنے والی قوتوں سے ہمدردی ہے۔

تیسرا دانستہ آبنائے تائیوان کے امن کو خراب کرنے کی کوشش ہے۔

(جاری ہے)

پیر کے روز چینی میڈ یا کے مطا بق وانگ ای نے کہا کہ چین کا ٹھوس موقف اور جوابی اقدامات جائز، معقول، قانونی، ضروری اور مناسب ہیں جن کا مقصد چین کی خودمختاری اور علاقائی سالمیت کا تحفظ ، چین کو کنٹرول کرنے کے لیے تائیوان کو استعمال کرنے کی امریکی کوششوں کو روکنا اور اسے کچلنا ہے۔

تائیوان حکام کا "علیحدگی کے حصول کے لیے امریکہ پر انحصار" کا تصور آبنائے تائیوان اور علاقائی استحکام کے لیے حقیقی معنوں میں خطرہ ہے۔وانگ ای نے زور دے کر کہا کہ اندرونی معاملات میں عدم مداخلت کا اصول ممالک کے درمیان تعلقات کا "سنہری اصول" ہے اور ترقی پذیر ممالک کے لیے اپنی خودمختاری اور سلامتی کے تحفظ کے لیے "بنیادی آلہ " ہے۔ ہمچین کے موقف کے ادراک اور حمایت پر تمام ممالک کا شکریہ ادا کرتے ہیں۔