مولانا اسعد محمود کی ہدایت پر این ایچ اے کا مسافروں کیلئے بڑا اقدام، ہکلہ ڈی آئی خان موٹروے پر عارضی قیام و طعام تیار

ہفتہ 13 اگست 2022 23:10

اسلام آباد (اُردو پوائنٹ اخبارتازہ ترین - این این آئی۔ 13 اگست2022ء) وفاقی وزیر مواصلات مولانا اسعد محمود کی ہدایت پر این ایچ اے کا مسافروں کیلئے بڑا اقدام کیا گیا ہے۔ ترجمان این ایچ اے کے مطابق ہکلہ ڈی آئی خان موٹروے پر عارضی قیام و طعام تیار کرلیا گیا، ہکلہ ڈی آئی خان موٹروے پر نماز کیلئے عارضی جگہ، پیٹرول پمپ، اور ٹک شاپ تیار کی گئی ہے۔

ترجمان نے کہا کہ 250 کلو میٹر سے زائد موٹروے پر مسافروں کو مشکلات کا سامنا کرنا پڑتا تھا۔

(جاری ہے)

انہوں نے کہا کہ وفاقی وزیر مولانا اسعد محمود، چئیرمین این ایچ اے کیپٹن ر محمد خرم آغا نے دو ہفتہ قبل ڈی آئی خان موٹروے کا دورہ کرکے مسافروں کی مشکلات کا جائزہ لیا تھا۔ وفاقی وزیر مواصلات مولانا اسعد محمود نے عوام کو موٹروے پر بہترین سہولیات فراہم کرنے کی ہدایت کی تھی۔ترجمان نے کہا کہ چئیرمین این ایچ اے کیپٹن ر محمد خرم آغا نے وفاقی وزیر کی ہدایت پر فوری عمل درآمد کروایا۔ انہوں نے کہا کہ عوام کو ہکلہ ڈی آئی خان موٹروے پر تمام سہولیات اب میسر ہوں گی۔