ٓآئی ایم ایف پاکستان کے عوام کو بھوک وافلاس میں دھکیلنا چاہتا ہے ایم ڈبلیو ایم

پاکستان کو مہنگائی اور غربت کا پیکیج دینے والوں کا عوام محاسبہ کرنے کی تیاریاں کررہے ہیں،مبشر حسن

بدھ 25 جنوری 2023 19:45

کراچی (اُردو پوائنٹ اخبارتازہ ترین - این این آئی۔ 25 جنوری2023ء) مجلس وحدت مسلمین پاکستا کراچی ڈویژن کے سیکریٹری سیاسیات علامہ مبشر حسن نے کہا ہے کہ پاکستان کو مہنگائی اور غربت کا پیکیج دینے والوں کا عوام محاسبہ کرنے کی تیاریاں کررہے ہیں،حکمرانوں نے مہنگائی کو کم نہیں کیا تو عوام کو سڑکوں پر آنے سے کوئی روک نہیں سکے گا۔ ان خیالات کا اظہار انہوں نے میڈیا کو جاری کردہ اپنے بیان میں کیا۔

علامہ مبشر حسن نے کہا کہ آئی ایم ایف سے قرضے لینے کیلئے عوام پر مہنگائی کے تابڑ توڑ حملے کا سلسلہ بند کیا جائے،مہنگائی عالمی مسئلہ نہیں ہے حکمران عوام پر رحم کریں، مہنگائی کو روکیں آئی ایم ایف استحصالی ادارہ ہے جو پاکستان کو کمزور کرنے کے درپے ہے۔

(جاری ہے)

ان کا مزید کہنا تھا کہ آئی ایم ایف غریب عوام دشمن پر مبنی پالیسیوں پر گامزن ہے، پاکستان کے عوام کو بھوک وافلاس میں دھکیلنا چاہتا ہے، عوام کوبنیادی حقوق سے محروم مہنگائی کے ذریعے آخری نوالہ تک چھینا جارہا ہے،عوام کے مسائل حل نہ کرنیوالی حکومت زیادہ چل نہیں سکتی حکمران ماضی سے سبق حاصل کریں،دعوؤں کا دور ختم ہوچکا اب تو عوام کو معاشی ریلیف دینا ہی ہوگا، مہنگائی کو روکنے میں حکمران بے بس ہیں، ملک کو سیاسی ومعاشی طور پر مستحکم بنانے کیلئے بیرونی پالیسیوں کو مسترد کرنا ہوگا،حکومت توانائی بحران کے خاتمے اور سستی بجلی فراہم کرنے کا وعدہ پورا کرے۔