متحدہ عرب امارات میں بھی پٹرول اور ڈیزل مہنگا

متحدہ عرب امارات میں پٹرولیم مصنوعات مہنگی ہونے کے باوجود رہائشیوں کو بڑھتی ہوئی مہنگائی سے بچانے کیلئے شاندار اقدام کے طور پر روز مرہ استعمال ہونے والی 200 سے زائد ضروری اشیاء کی قیمتیں منجمد کرنے کا اعلان کردیا گیا ہے، جس کا اطلاق 2023ء کے آخر تک تازہ پیداوار اور سپر مارکیٹ کی اشیاء سمیت تمام زمروں میں روزمرہ کی مصنوعات پر ہوگا۔

بتایا گیا ہے کہ عالمی افراط زر کی شرح کو مات دینے اور متحدہ عرب امارات کے رہائشیوں کی مدد کرنے کے مقصد سے لولو ہائپر مارکیٹ نے 200 سے زائد مصنوعات پر 'پرائس لاک' مہم کا اعلان کیا ہے، جس کا مطلب ہے کہ 2023ء کے آخر تک ملک کے تمام لولو اسٹورز پر تازہ مصنوعات اور سپر مارکیٹ کی اشیاء سمیت تمام زمروں میں روزمرہ کی مصنوعات کی قیمتوں میں کوئی اضافہ نہیں ہوگا۔

اس حوالے سے لولو دبئی کے ڈائریکٹر سلیم ایم اے نے کہا کہ ہمارے گروپ کو اس جدید 'پرائس لاک' پروجیکٹ کا اعلان کرتے ہوئے خوشی ہو رہی ہے تاکہ ہمارے لولو ہائپر مارکیٹ کے صارفین کو عالمی قیمتوں کی افراط زر سے نمٹنے میں مدد ملے جس سے ہر کوئی جدوجہد کر رہا ہے، ہم مقامی مارکیٹ کو متوازن کرنے اور معیار زندگی کو برقرار رکھنے کے لیے اپنے سپلائرز کے ساتھ مل کر کام کر رہے ہیں جس کے لیے متحدہ عرب امارات جانا جاتا ہے، اس مہم کا اطلاق روزمرہ کی مصنوعات کی تمام اِن اسٹور خریداریوں پر ہوتا ہے۔

بلومبرگ نے رپورٹ کیا ہے کہ دبئی میں مہنگائی کی شرح بلند ترین سطح پر پہنچ گئی ہے جس کی وجہ سے ناصرف ٹرانسپورٹ اور تفریحی سرگرمیوں کے اخراجات میں غیرمعمولی اضافہ ہوا بلکہ اشیائے صرف کی قیمتیں بھی بڑھ گئیں، صارفین کے لیے قیمتوں کی سطح یورپی ممالک اور سنگاپور کی طرح آسمان کو چھونے لگی، صورتحال پچھلے 3 برسوں کے دوران افراط زر میں ہونے والے اضافے کی وجہ سے ہوئی۔