باغات میں پودوں کے تنے کے گرد پرانی بوری یاپرالی لپیٹ کرسردی کااثر کم کیاجاسکتاہے، محکمہ زراعت

جمعہ 3 فروری 2023 14:52

فیصل آباد (اُردو پوائنٹ اخبارتازہ ترین - اے پی پی۔ 03 فروری2023ء) محکمہ زراعت نے سردی اورکورے کے نقصان دہ اثرات سے بچاؤ کیلئے باغبانوں کو پودوں کے تنوں پرچونے اور نیلے تھوتھے کے محلول سے فوری سفیدی کی ہدایت کی ہے ۔نظامت زرعی اطلاعات محکمہ زراعت نے کاشتکاروں سے کہا کہ باغات میں پودوں کے تنے کے گرد پرانی بوری یاپرالی لپیٹ کر بھی سردی کااثر کم کیاجاسکتاہے۔

انہوں نے بتایا کہ موسم سرما میں کیڑے اور بیماریاں پھلوں کے پودوں کو کمزور کردیتی ہیں اس لیے ان کا بروقت تدارک ضروری ہے تاکہ پودے تندرست و توانا رہ سکیں۔

(جاری ہے)

انہوں نے کہاکہ کہر کی متوقع راتوں میں آبپاشی کی جائے کیونکہ اس سے زمین کے درجہ حرارت میں خاطرخواہ کمی نہیں ہوتی اور پودوں کے خلیوں میں پانی کی مقدار بڑھ جاتی ہے۔انہوں نے کہاکہ باغات میں مختلف جگہوں پر گڑھے کھود کر ان میں پتے، گھاس پھوس،بھوسہ یا پرالی وغیرہ جلا کر دھواں کرنے سے بھی کورے کے اثر کو کم کیاجاسکتاہے۔

انہوں نے بتایاکہ نرسری میں نازک پودے سخت سردی سے بری طرح متاثر ہوتے ہیں اس لیے اگر مناسب احتیاطی تدابیر اختیار نہ کی جائیں تو یہ پودے مربھی جاتے ہیں لہٰذا ان کو سرکنڈے یا پرالی سے اچھی طرح ڈھانپنا ضروری ہے۔