کراچی، سرجانی ٹائون میں مزاحمت پر ڈاکوئوں کی فائرنگ سے زخمی نوجوان شرجیل دم توڑ گیا

کراچی (اُردو پوائنٹ اخبارتازہ ترین - آن لائن۔ 03 فروری2023ء) سرجانی ٹائون میں ڈکیتی کی واردات کے دوران مزاحمت پر ڈاکوئوں کی فائرنگ سے زخمی ہونے والا نوجوان شرجیل دم توڑ گیا، جاں بحق ہونے والا نوجوان پانچ بہن بھائیوں میں سب سیبڑا اور گھر کا واحد کفیل تھا۔تفصیلات کے مطابق بدھ کو سرجانی ٹائون لیاری 36 ٹینکی اسٹاپ کے قریب ایل پی جی سلنڈر کی دکان میں ڈکیتی کی واردات کے دوران مزاحمت پرڈاکوئوں نے فائرنگ کر کے 34 سالہ عبدالعظیم ولد عبدالکلیم اور 32 سالہ شرجیل ولد شبیر کو زخمی کردیا تھا جنہیں فوری طور پر عباسی شہید اسپتال منتقل کردیا گیا۔

بعدازاں فائرنگ سے زخمی ہونے والے شرجیل کو تشویشناک حالت میں جناح اسپتال منتقل کیا گیا تھا جہاں زخمی شرجیل جمعہ کی صبح دوران علاج دم توڑ گیا، مقتول نوجوان سرجانی ٹائون لیاری 36 اے کا رہائشی اور پانچ بہن بھائیوں میں سب سے بڑا اور گھر کا واحد کفیل تھا، مقتول نوجوان کی نماز جنازہ بعد نماز عصر سرجانی ٹائون میں گھر کے قریب ادا کی گئی۔

(جاری ہے)

مقتول کے رشتہ داروں اور محلے داروں نے بتایا کہ مقتول شرجیل ایم پی جی سلنڈرکی دکان میں کام کرتا تھا بدھ کو نامعلوم مسلح ملزمان دکان میں ڈکیتی کرکے فرار ہو رہے تھے جس پر شرجیل اور دیگر دکاندار ڈاکوئوں کو پکڑنے کے لیے ان کے پیچھے دوڑے اور کچھ فاصلے پر شرجیل نے ایک ڈاکو کو پکڑنے کی کوشش کی اس دوران ایک ڈاکو سے پستول بھی گر گیا جس پر ڈاکو نے پستول اٹھا کر فائرنگ کردی جس کے نتیجے میں شرجیل اوراسٹیٹ ایجنٹ عبدالعظیم زخمی ہو گیا۔

اہلخانہ اورعلاقہ مکینوں کا کہنا تھا کہ ڈکیتوں نے جینا مشکل کردیا ہے اور ہر چند روز کے بعد نوجوانوں کی لاشیں اٹھا اٹھا کرتھک گئے ہیں، پولیس شہریوں کی جان ومال کا تحفظ فراہم کرنے میں مکمل ناکام ہوچکی ہے اگر پولیس شہریوں کوتحفظ فراہم نہیں کر سکتی تو شہریوں کواپنی حفاظت کرنے کااختیار دے دیں تاکہ شہری خود مسلح ڈاکوئوںسے مقابلہ کر سکیں۔واضح رہے کہ شہرمیں رواں سال ڈکیتی کی وارداتوں کے دوران مزاحمت پر جاں بحق ہونے والے شہریوں کی تعداد 14 ہو گئی ہے جبکہ 50 سے زائد افراد زخمی ہو چکے ہیں۔