کراچی،میزان بینک نے دنیا کے بہترین اسلامی ریٹیل بینک کا ایوارڈ جیت لیا

بدھ 22 مارچ 2023 20:24

کراچی (اُردو پوائنٹ اخبارتازہ ترین - اے پی پی۔ 22 مارچ2023ء) ریڈ منی گروپ ملائیشیا کے اسلامک فنانس نیوز(آئی ایف این)نے میزان بینک کو 2022کے لئے دنیاکےبہترین اسلامک ریٹیل بینک کا ایوارڈ دے دیا۔ بدھ کو جاری اعلامیہ کے مطابق اسلامک فنانس نیوز ایوارڈز میں میزان بینک نے پاکستان سطح کے تمام 6ایوارڈز بھی جیت لئے ۔ بینک کی یہ کامیابی پاکستان کے ساتھ ساتھ دنیا بھر میں اسلامی بینکاری کی بے مثال کامیابی اور مختلف شعبوں میں بینک کی بڑھتی ہوئی مضبوطی کی عکاسی ہے۔

آئی ایف این ایوارڈز میں میزان بینک نے دنیا کے بہترین اسلامی ریٹیل بینک کے ساتھ ساتھ پاکستان کے بہترین اسلامک بینک، بہترین انوسٹمنٹ بینک، بہترین کارپوریٹ بینک، بہترین ریٹیل بینک،پاکستان کے سب سے جدید بینک اور ڈیجیٹل پیشکش کرنے والے پاکستان کے بہترین بینک کے ایوارڈز بھی جیت لئے ہیں۔

(جاری ہے)

میزان بینک گزشتہ 17سالوں سے پاکستان کے بہترین بینک کا ایوارڈ حاصل کررہاہے جو بینک کے استحکام اور تمام کیٹگریز کے صارفین کو شریعہ کے مطابق جدید موافق بینکنگ سلوشنز فراہم کرنے کی بینک کی صلاحیت کا اظہارہے۔

میزان بینک کے صدر اور چیف ایگزیکٹو آفیسر عرفان صدیقی نے اپنے بیان میں کہاہے کہ میزان بینک نے آئی ایف این کی جانب سے دنیا کے بہترین اسلامی ریٹیل بینک کاایوارڈ حاصل کیا ہے۔ ہم اپنے صارفین کے مشکورہیں جو اسلامی بینکاری کی حمایت کرتے ہیں ا ور ہرسال ہمیں ووٹ دیتے ہیں۔ ہمارا استحکام، اسلامی مالیاتی شعبہ کی ترقی کیلئے ہماری شراکت اور سب سے اہم بات اسلامی بینکاری کو اولین ترجیح بنانے کیلئے ہماری غیر متزلزل وابستگی کو تسلیم کرنے پر ہم اپنے ساتھیوں اور سٹیک ہولڈرز کے مشکورہیں۔

اسلامک فنانس نیوز ایوارڈز میں دنیا بھرکے اسلامی مالیاتی انڈسٹری کے بہترین افراد کو ایوارڈز سے نوازاجاتاہے اور یہ ایوارڈز عالمی مالیاتی اسلامی انڈسٹری میں سب سے زیادہ باوقار او رتسلیم شدہ ایوارڈز میں سے ایک ہے۔ اسلامک فنانس نیوز بہترین اسلامی مالیاتی اداروں کے تعین کیلئے ہر سال بہترین بینکس پول کا بھی انعقاد کرتاہے۔