برطانیہ سے ترسیلات زر میں 34 فیصد اضافہ

منگل 13 مئی 2025 14:21

اسلام آباد (اُردو پوائنٹ اخبارتازہ ترین - اے پی پی۔ 13 مئی2025ء) برطانیہ میں رہنے والے پاکستانیوں کی ترسیلات زر میں جاری مالی سال کے پہلے 10 ماہ میں سالانہ بنیادوں پر 34 فیصد اضافہ ریکارڈ کیا گیا ہے۔ سٹیٹ بینک کی جانب سے جاری کردہ اعدادوشمار کے مطابق جولائی سے اپریل تک کی مدت میں برطانیہ میں رہنے والے پاکستانیوں نے 4.779 ارب ڈالر زرمبادلہ ملک ارسال کیا جو گزشتہ مالی سال کی اسی مدت کے مقابلے میں 34 فیصد زیادہ ہے۔

گزشتہ مالی سال کی اسی مدت میں برطانیہ میں رہنے والے پاکستانیوں نے 3.561 ارب ڈالر زرمبادلہ ملک ارسال کیا تھا۔ اپریل میں برطانیہ سے ترسیلات زر کا حجم 535 ملین ڈالر ریکارڈ کیا گیا جو گزشتہ سال اپریل کے مقابلے میں 33 فیصد زیادہ ہے۔ گزشتہ سال اپریل میں برطانیہ سے ترسیلات زر کا حجم 403 ملین ریکارڈ کیا گیا تھا۔

(جاری ہے)

مارچ کے مقابلے میں اپریل میں برطانیہ سے ترسیلات زر میں ماہانہ بنیادوں پر 22 فیصد کی کمی ریکارڈ کی گئی ہے۔

مارچ میں برطانیہ سے ترسیلات زر کا حجم 684 ملین ریکارڈ کیا گیا جو اپریل میں کم ہو کر 535 ملین ڈالر ہوگیا۔ واضح رہے کہ مالی سال کے پہلے 10 ماہ میں سمندر پار پاکستانیوں کی مجموعی ترسیلات زر کا حجم 31.21 ارب ڈالر ریکارڈ کیا گیا ہے جو گزشتہ مالی سال کے اسی مدت کے 23.85 ارب ڈالر کے مقابلے میں 31 فیصد زیادہ ہے۔

Facebook Twitter Google + Share on Whatsapp

برطانیہ سے ترسیلات زر میں 34 فیصد اضافہ

متعلقہ عنوان :

مزید تجارتی خبریں