احتساب عدالت ، 190ملین پاؤنڈز سکینڈل کیس میں چیئرمین پی ٹی آئی کے جسمانی ریمانڈ میں 2 روز کی توسیع کا حکمنامہ جاری

بدھ 22 نومبر 2023 23:02

اسلام آباد (اُردو پوائنٹ اخبارتازہ ترین - اے پی پی۔ 22 نومبر2023ء) احتساب عدالت نے190ملین پاؤنڈز سکینڈل کیس میں چیئرمین پی ٹی آئی کے جسمانی ریمانڈ میں دو روز کی توسیع کا حکم نامہ جاری کردیا۔ عدالت کے جج محمد بشیر کی جانب سے جاری چار صفحات پر مشتمل تحریری حکمنامہ میں کہا گیا ہے کہ چیئرمین پی ٹی آئی گزشتہ چار دن نیب کی تحویل میں رہ چکے ہیں۔ نیب نے چیئرمین پی ٹی آئی کے مزید پانچ روزہ جسمانی ریمانڈ کی استدعا کی۔

نیب کے مطابق جسمانی ریمانڈ کے دوران چیئرمین پی ٹی آئی سے تفتیش کے دوران نئے حقائق سامنے آئے جن کی مزید تحقیق کی ضرورت ہے۔ تفتیش کے حتمی نتیجے پر پہنچنے کیلئے چیئرمین پی ٹی آئی کا مزید جسمانی ریمانڈ ضروری ہے۔ نیب کے مطابق مقدمہ سے متعلق اصل دستاویزات مطلوب ہیں جو علی ظفر ایڈووکیٹ کی تحویل میں ہیں۔

(جاری ہے)

ان دستاویزات سے متعلق جرح کے بعد تفتیش مکمل کرلی جائے گی۔

چیئرمین پی ٹی آئی کے وکیل کا کہنا ہے کہ نیب پہلے ہی کیس سے متعلق تمام دستاویزات تحویل میں لے چکا۔ نیب کے پاس مزید جسمانی ریمانڈ کا کوئی قانونی جواز نہیں۔ عدالت دستاویزات سے متعلق جرح کیلئے چیئرمین پی ٹی آئی کے جسمانی ریمانڈ میں پانچ کے بجائے دو روز کی توسیع کرتی ہے۔ چیئرمین پی ٹی آئی کو 23نومبر کو دوبارہ عدالت میں پیش کیا جائے۔