بارات سے قبل دولہا ووٹ دینے پولنگ اسٹیشن پہنچ گیا

ووٹ قوم کی امانت ہے اور یہ قومی فریضہ ادا کرنے کے لیے ہی میں ووٹ ڈالنے آیا ہوں،بابر راجپوت

جمعرات 8 فروری 2024 16:17

نوشہروفیروز (اُردو پوائنٹ اخبارتازہ ترین - این این آئی۔ 08 فروری2024ء) عام انتخابات کے سلسلے میں جمعرات کو ملک بھر میں پولنگ ہوئی ۔سندھ کے شہر محراب پور میں ایک دولہا بارات لے کر روانہ ہونے سے قبل ووٹ ڈالنے پولنگ اسٹیشن پہنچ گیا۔

(جاری ہے)

ووٹ کی امانت کی ادائیگی کی ایک مثال سندھ کے ضلع نوشہرو فیروز کے شہر محراب پور میں سامنے آئی ہے جہاں ایک نوجوان دولہا نے شادی کے موقع پر اپنے قومی فریضے کی ادائیگی کو اولیت دی اور بارات لے کر دلہن کے گھر روانہ ہونے سے قبل پولنگ اسٹیشن پہنچا اور اپنا ووٹ کاسٹ کیا۔

بابر راجپوت نامی یہ دولہا این اے 205 کا ووٹر ہے جہاں اس نے دلہنیا لانے کے لیے نوابشاہ روانگی سے قبل متعلقہ پولنگ اسٹیشن پہنچ کر اپنے جمہوری حق کا استعمال کرتے ہوئے ووٹ کاسٹ کیا۔اس موقع پر دولہا نے کہا کہ شادی زندگی کا ایک اہم اور یادگار دن ہے اور وہ اپنی دلہنیا لینے کے لیے نوابشاہ جا رہے ہیں تاہم ووٹ قوم کی امانت ہے اور یہ قومی فریضہ ادا کرنے کے لیے ہی میں ووٹ ڈالنے آیا ہوں۔