مخالف امیدوار کی فتح پر مبارکباد اور شکست تسلیم کرنے پر خواجہ سعد رفیق کی تعریفیں

جمعہ 9 فروری 2024 18:04

لاہور(اُردو پوائنٹ اخبارتازہ ترین - این این آئی۔ 09 فروری2024ء) لاہور کے حلقہ این اے 122 میں مسلم لیگ (ن) کے سینئر رہنما خواجہ سعد رفیق کی جانب سے اپنے مد مقابل امیدوار سردار لطیف کھوسہ سے شکست کو تسلیم کرنے اور انہیں کامیابی پر مبارکباد دینے پر خواجہ سعد رفیق کی تعریفیں کی جارہی ہیں۔غیر سرکاری، غیر حتمی نتائج سامنے آتے ہی سوشل میڈیا پلیٹ ایکس پر جاری اپنے بیان میں سعد رفیق نے کہا کہ سردارلطیف کھوسہ صاحب کو دلی مبارکباد دی، عوامی فیصلے پر خوش دلی سے سر تسلیم خم کرتا ہوں۔

انہوں نے کہا کہ اللہ آنے والی پارلیمان کومتحد ہوکرقومی بحرانوں پرقابوپانے کی توفیق دے۔سعد رفیق کی جانب سے کھلے دل سے فیصلے کو تسلیم کرنے اور مخالف امیدوار کو مبارک دینے پر دیگر سیاسی جماعتوں کے رہنما اور عام عوام بھی لیگی رہنما کی تعریف کررہے ہیں۔

(جاری ہے)

پی ٹی آئی کی سابق سیاسی رہنما اور سابق وفاقی وزیر شیریں مزاری نے ٹوئٹ کرتے ہوئے خواجہ سعد کی جانب سے شکست تسلیم کرنے اور جمہوری عمل کے نتائج کو قبول کرنے پر انہیں سراہا۔

پاکستان تحریک انصاف کے آفیشل ٹوئٹر اکائونٹ سے بھی خواجہ سعد کے اس عمل کو سراہا گیا اور طنز کرتے ہوئے کہا کہ امید ہے ان کے لیڈر بھی لیگی رہنما کے اس عمل کو فالو کریں گے۔اداکار عدنان صدیقی نے سراہتے ہوئے کہا کہ انہوں نے ہمارے دل جیت لیے ہیں۔اداکار نے کہا کہ ایک عظیم رہنما ہونے کا مطلب ہے فتح اور شکست دونوں کو عاجزی کے ساتھ قبول کرنا۔صحافیوں کی جانب سے بھی خواجہ سعد رفیق کی جانب شکست تسلیم کرنے اور مخالف امیدوار کو مبارک باد دینے پر سراہا گیا۔