ایس ای سی پی نے ڈیجیٹل قرض فراہم کرنے والی کمپنیوں کے لئے مارکیٹنگ اور کال سینٹر مینجمنٹ کی گائیڈ لائنز جاری کردیں

اسلام آباد (اُردو پوائنٹ اخبارتازہ ترین - اے پی پی۔ 18 مارچ2024ء) سکیورٹیز اینڈ ایکسچینج کمیشن آف پاکستان (ایس ای سی پی) نے ڈیجیٹل ذرائع سے قرض فراہم کرنے والی نان بینکنگ فنانس کمپنیوں کے لئے قرضوں کی فراہمی کی مارکیٹنگ و اشتہارات اور کال سینٹر کے ذریعے صارفین سے رابطہ کے لئے بہترین معیارات اپنانے کے لئے گائیڈ لائنز جاری کر دی ہیں۔ رہنما گائیڈ لائنز کا مقصد قرض لینے والے صارفین کو تحفظ فراہم کرنا اور دھوکہ دہی پر مبنی مارکیٹنگ کے طریق اور کال سینٹر کے ذریعے صارفین کی ہراسگی کی روک تھام کرنا ہے۔

ایس ای سی پی سے لائسنس یافتہ غیر بینکنگ مالیاتی کمپنیاں قرض کی مصنوعات کی مختلف سوشل میڈیا پلیٹ فارمز کے ذریعے مارکیٹنگ کرتی ہیں ۔ ڈیجیٹل قرض فراہم کرنے والی کمپنیاں اپنے صارفین کے ساتھ رابطے اور قرض کی ریکوری کے لئے کال سینٹر پر انحصار کرتی ہیں۔

(جاری ہے)

بعض اوقات کال سینٹر کی سہولت آئوٹ سورس سے بھی حاصل کی جاتی ہے۔ نتیجتاً کال سینٹرز ان کمپنیوں کے کاروباری آپریشنز کا ایک لازمی پہلو بن گئے ہیں۔

ایس ای سی پی سمجھتا ہے کہ کمپنیوں کو کاروباری آپریشنز میں ذمہ دارانہ رویے اور اپنی تشہیر میں شفافیت اور ایمانداری اور صارفین کے ساتھ اخلاقی رویے اپنانے چاہیئں ۔ اس لئے اس سلسلے میں کمپنیوں کو رہنمائی فراہم کرنے کے لئے ایس ای سی پی کی جاری کی گئی گائیڈ لائنز اور ان معیارات کو اپنے کال سینٹرز کے لیے لازمی بنائیں۔ تمام این بی ایف سیز جو کہ ڈیجیٹل لینڈنگ (قرض کی فراہمی) کے کاروبار سے وابستہ ہیں ، کے لئے ان گائیڈ لائنز پر عمل درآمد لازمی ہے۔ یہ گائیڈ لائنز ایس ای سی پی کی ویب سائٹ پر دستیاب ہیں۔