ٹیوٹا کو عالمی مارکیٹ کی ضروریات کے مطابق ہنر مند افرادی قوت کی تیاری کے لئے کام کرنا ہوگا،وزیر صنعت و تجارت پنجاب

لاہور (اُردو پوائنٹ اخبارتازہ ترین - اے پی پی۔ 26 مارچ2024ء) وزیر صنعت و تجارت پنجاب چوہدری شافع حسین کی زیر صدارت ٹیوٹا سیکرٹریٹ میں اجلاس منعقد ہوا،جس میں ٹیوٹا کی جاری ترقیاتی سکیموں پر پیش رفت اور سی ایم یوتھ سکلز ڈویلپمنٹ پروگرام کے مختلف پہلوئوں کا جائزہ لیا گیا۔ اجلاس میں ٹیوٹا کے موجودہ اداروں میں بہتری لائے بغیر کوئی نیا ادارہ نہ بنانے کا فیصلہ کیاگیا۔

صوبائی وزیر صنعت و تجارت نے اجلاس سے خطاب کرتے ہوئے کہا کہ ٹیوٹا کے اداروں اور لیبز کو عالمی تقاضوں سے ہم آہنگ کیا جائے گا،ٹیوٹا کو عالمی مارکیٹ کی ضروریات کے مطابق ہنر مند افرادی قوت کی تیاری کے لئے روایتی انداز سے ہٹ کر کام کرنا ہوگا۔چوہدری شافع حسین نے کہا کہ لیبز کو یوایم ٹی جیسی یونیورسٹیوں کے تعاون سے اپ گریڈ کیا جائے جبکہ ٹیوٹا کے اداروں میں طلبہ اور سٹاف کی بائیو میٹرک حاضری یقینی بنائی جائے۔

(جاری ہے)

صوبائی وزیر نے کہا کہ مائیکرو چپ مینوفیکچرنگ مستقبل کی ضرورت ہے،اس پر خصوصی توجہ دی جائے۔ٹیوٹا کے اداروں میں عربی،جرمن،کورین،جاپانی اور ہسپانوی لینگویج کورسز شروع کئے جائیں اور ٹیوٹا کے اداروں کا نصاب عالمی مارکیٹ اور مقامی انڈسٹری کی ضروریات کے مطابق تیار کیا جائے۔صوبائی وزیر صنعت و تجارت نے ٹیوٹا کی ویب سائٹ میں بہتری لانے کی بھی ہدایت کی۔چیئرمین ٹیوٹا بریگیڈیئر (ر)محمد ساجد کھوکھر نے ادارے کی ترقیاتی سکیموں پرپیش رفت بارے بریفنگ دی اور آئندہ کے لائحہ عمل سے بھی آگاہ کیا۔ اجلاس میں سیکرٹری صنعت و تجارت احسان بھٹہ،سی ای او قراة العین،سینئر ڈی جی اختر عباس بھروانہ، سینئر اکنامک ایڈوائزر جاوید اقبال اور متعلقہ افسران نے شرکت کی۔