ً ایکسائز نارکوٹکس کنٹرول ٹیم کا ملیر اور کورنگی میں کامیاب آپریشن ،منشیات کے اسمگلنگ کی کوشش ناکام

اتوار 31 مارچ 2024 02:30

کراچی (اُردو پوائنٹ اخبارتازہ ترین - آن لائن۔ 31 مارچ2024ء) وزیر شرجیل انعام میمن کی ہدایات پر ایکسائز نارکوٹکس کنٹرول ٹیم نے ملیر اور کورنگی میں کامیاب آپریشن کرتے ہوئے منشیات کے اسمگلنگ کی کوشش ناکام بنا دی ہے۔ ایکسائز نارکوٹکس کنٹرول ٹیم نے ملیر کینٹ روڈ پر فاطمہ جناح پارک کے پاس منشیات فروشوں کے خلاف آپریشن کرتے ہوئے بدنام زمانہ منشیات فروش گل رحمان اور عبدالقدیر گرفتار کرلیا۔

ملزم کے قبضے سے ساڑھے دس کلو چرس برآمد کرلی گئی ہے۔

(جاری ہے)

کورنگی میں ایکسائز نارکوٹکس کنٹرول ٹیم نے مقام فاروق اعظم روڈ پر کاروائی کرتے ہوئے بدنام زمانہ منشیات فروش لعل مرجان ولد جانان کو گرفتار کرکے ملزم کے قبضے سے 50 پیکٹس پر مشتمل 25 کلو گرام چرس برآمد کرلیا گیا۔ ملزمان کے خلاف مقدمات درج کر لئے گئے ہیں۔ صوبائی وزیر شرجیل انعام میمن نے منشیات کے خلاف کامیاب آپریشنز پر ایکسائز نارکوٹکس کنٹرول ٹیم کو مبارکباد دی ہے۔

انہوں نے کہا ہے کہ ہمارے نوجوانوں کو منشیات کی لعنت کے خلاف متحرک ہوجانا چاہئے، بیداری، آگہی اور فعال شمولیت کو فروغ دے کر، ہم اپنے معاشرے کا تحفظ یقینی بنا سکتے ہیں۔ شرجیل انعام میمن نے کہا کہ منشیات سے پاک معاشرے کی تعمیر کے لیے ہر فرد کا کردار ناگزیر ہے۔ #