اے این ایف کا منشیات اسمگلنگ کے خلاف کارروائیاں

نومختلف کارروائیوں میں 97 کلو منشیات برآمد کر کے خواتین سمیت 10 ملزمان گرفتار کر لیے گئے

پیر 8 اپریل 2024 20:38

اسلام آباد(اُردو پوائنٹ اخبارتازہ ترین - آن لائن۔ 08 اپریل2024ء) اے این ایف کا منشیات اسمگلنگ کے خلاف کارروائیوں کا سلسلہ جاری۔ نو مختلف کارروائیوں میں 97 کلو منشیات برآمد کر کے خواتین سمیت 10 ملزمان گرفتار کر لیے گئے۔ مقدمات بھی درج کر کے تفتیش شروع کر دی گئی۔ترجمان اے این ایف کے مطابق اسلام آباد ایئرپورٹ پر ابو ظہبی جانے والے مسافر سے 2.7 کلو چرس ،کراچی ایئرپورٹ پر جدہ جانے والے مسافر اور سہولت کار سے 23580 نشہ آور گولیاں برآمد ہوئیں۔

(جاری ہے)

کراچی ایئرپورٹ پر دوحہ جانے والے مسافر سے 2 کلو آئس جبکہ کراچی ایئرپورٹ پر ایک اور کارروائی میں تھائیلینڈ جانے والے مسافر سے 868 گرام ہیروئن برآمد کر لی گئی۔ اسی طرح آر سی ڈی روڈ حب سے 67 کلو ہیروئن ،طورخم بارڈر کے قریب سے 14 کلو چرس ، ایم ون موٹر وے اسلام آباد کے قریب دو خواتین سے 4 کلو آئس ، سنگجانی ٹول پلازہ اسلام آباد کے قریب دو خواتین سے 2 کلو چرس اور 1 کلو افیون جبکہ کچلاک کوئٹہ میں دو ملزمان سے 2 کلو آئس برآمد کی گئی ہے۔ ترجمان کا کہنا ہیکہ گرفتار ملزمان کے خلاف انسدادِمنشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔