اسلام آباد کا کوئی پرسانِ حال نہیں‘ چیف جسٹس عامر فاروق

نیا آئی جی تاحال تعینات نہ ہونے پر دو ہفتوں میں رپورٹ طلب کرلی

جمعرات 18 اپریل 2024 20:32

اسلام آباد (اُردو پوائنٹ اخبارتازہ ترین - آن لائن۔ 18 اپریل2024ء) وفاقی دارالحکومت میں نیا آئی جی تاحال تعینات نہ ہونے پر اسلام آباد ہائیکورٹ نے حکومت سے دو ہفتوں میں رپورٹ طلب کرلی۔اسلام آباد ہائی کورٹ میں زیر سماعت روڈ ایکسڈنٹ میں جاں بحق شہری سے متعلق کیس میں آئی جی اسلام آباد کی تعیناتی کا تذکرہ ہوا، جس پر اسلام آباد ہائی کورٹ نے آئی جی اسلام آباد کی تعیناتی سے متعلق حکومت سے دو ہفتوں میں رپورٹ طلب کرلی۔

(جاری ہے)

اسلام آباد ہائی کورٹ کے چیف جسٹس عامر فاروق نے ڈپٹی اٹارنی جنرل سے مکالمہ کرتے ہوئے ریمارکس دیئے کہ ’نیا آئی جی تاحال کیوں نہیں تعینات ہوا ویسے تو اسلام آباد کا کوئی پرسانِ حال نہیں ہے کوئی آئی جی تو لگا دیں، جو پہلے آئی جی تھے نئے افسر کے آنے تک اسے ہی رہنے دیتے یا پولیس کو ختم ہی کر دیں پھر سکون ہو جائے گا یا پھر جیسے بلوچستان میں ہو رہا ہے ویسے یہاں بھی ہو جائے گا،اس موقع پر ڈپٹی اٹارنی جنرل نے بتایا کہ نئے آئی جی کی تعیناتی کا ایک نوٹیفکیشن ہوا تھا‘، جس پر چیف جسٹس عامر فاروق نے ریمارکس دیئے کہ ’نوٹی فکیشن ہوا تھا لیکن آپ کو پتا ہے مجھے بھی پتا ہے کیوں آئی جی نہیں آ رہا، کل سیکرٹری آئے تھے ان سے کہیں آئی جی لگائیں،عدالت نے دو ہفتوں میں آئی جی تعیناتی سے متعلق رپورٹ جمع کرانے کا حکم دیدیا۔