اسلام آباد میں خاتون ڈرائیور نے موٹروے پولیس اہلکار پرگاڑی چڑھا دی، ویڈیو وائرل

پیر 22 اپریل 2024 20:10

اسلام آباد (اُردو پوائنٹ اخبارتازہ ترین - این این آئی۔ 22 اپریل2024ء) اسلام آباد میں خاتون ڈرائیور نے موٹروے پولیس اہلکار پر گاڑی چڑھا دی اور واقعے کی ویڈیو سوشل میڈیا پر وائرل ہوگئی۔ترجمان موٹروے پولیس کے مطابق واقعہ یکم جنوری کو پیش آیاتھا اور خاتون ڈرائیور کے خلاف مقدمہ درج ہے۔

(جاری ہے)

سوشل میڈیا پر زیرگردش ویڈیو میں دیکھا جاسکتا ہے کہ خاتون ڈرائیور کو موٹروے پولیس نے روکا تو خاتون ڈرائیور نے موٹروے پولیس سے تکرار شروع کردی۔

ویڈیو میں خاتون ڈرائیور کو تیزی سے موٹروے پولیس اہلکار پر گاڑی چڑھا کرفرار ہوتے دیکھا جاسکتا ہے۔پولیس ذرائع نے بتایاکہ نامعلوم خاتون ڈرائیور کے خلاف مقدمہ راولپنڈی کے تھانہ نصیرآباد میں درج کیا گیا تھا۔ پولیس ذرائع کے مطابق خاتون ڈرائیور کے خلاف صرف مقدمہ درج ہوا ہے، ابھی گرفتاری نہیں ہوئی۔