اماراتی قونصل جنرل نے لاڑکانہ میں اسپتال، دادو میں متاثرین سیلاب کی ہائوسنگ اسکیم کا افتتاح کر دیا

لاڑکانہ(اُردو پوائنٹ اخبارتازہ ترین - این این آئی۔ 15 مئی2024ء) متحدہ عرب امارات کے قونصل جنرل کراچی بخیت عتیق الرومیتی نے لاڑکانہ میں جدید طرز کے اسپتال اور دادو میں سیلاب متاثرین کیلئے ہاسنگ اسکیم کا افتتاح کر دیا۔ یو اے ای حکومت کے تحت تیار کردہ ہائوسنگ اسکیم کے افتتاح کے موقع پر قونصل جنرل بخیت عتیق الرومیتی کے ہمراہ ہلال احمر یو اے ای کے جنرل سیکریٹری راشد مبارک المنصوری اور دیگر بھی موجود تھے۔

راشد مبارک المنصوری نے میڈیا کو بتایا کہ لاڑکانہ میں اسپتال کی او پی ڈی بلڈنگ کو جدید طرز پر بنایا گیا ہے۔ اسپتال میں ڈاکٹرز کیلئے ہاسٹل کی عمارت بھی تعمیر کی گئی ہے۔ انہوں نے کہا کہ اسپتال میں مریضوں کا بہترین علاج بلامعاوضہ کیا جائے گا۔ راشد مبارک المنصوری نے بتایا کہ سندھ کے سیلاب متاثرین چھت سے محروم ہیں ان کو چھت مہیا کرنا یو اے ای حکومت اپنا فرض سمجھتی ہے۔

(جاری ہے)

سیلاب سے متاثرہ خاندانوں کو گھر ملنا ان کا حق ہے جو وہ سیلاب میں کھو چکے تھے۔ ہاوسنگ اسکیم کے تحت سیلاب متاثرین ایک بہتر طرز زندگی گزار سکیں گے۔ ہائوسنگ اسکیم سے متاثرین کی بحالی میں آسانی پیدا ہو پائے گی۔ قونصل جنرل یو اے ای کراچی بخیت عتیق الرومیتی کا کہنا ہے کہ متحدہ عرب امارات کی حکومت نے صحت کے سیکٹر میں اسپتال کے قیام کا وعدہ پورا کر دیا۔

انہوں نے میڈیا کو بتایا کہ ہلال احمر پاکستان میں سیلاب متاثرین اور رمضان میں راشن تقسیم کرنے میں پیش پیش رہتا ہے۔ ہلال احمر پاکستان میں صحت کے نظام کو بین الاقوامی سطح پر لانے لانے کیلئے کوشاں ہے۔انہوں نے کہا یو اے ای حکومت کی جانب سے سندھ کے سیلاب متاثرین کیلئے ہاسنگ اسکیم ایک اور تحفہ ہے۔ متحدہ عرب امارات کی حکومت، پاکستانی عوام کی ہر مشکل سے واقف ہے۔