اوورلوڈڈ گاڑیوں کو موٹرویز اور ہائی ویز پر داخلے کی ہرگز اجازت نہیں ہوگی، آئی جی موٹر وے پولیس

اسلام آباد (اُردو پوائنٹ اخبارتازہ ترین - اے پی پی۔ 16 مئی2024ء) انسپکٹر جنرل نیشنل ہائی ویز اینڈ موٹروے پولیس سلمان چوہدری نے ہدایت کی ہے کہ 100فیصد ایکسل لوڈ کنٹرول رجیم پر عمل درآمد کے اہداف کو ہر حال میں یقینی بنایا جائے گا، اوور لوڈڈ گاڑیوں کو موٹرویز اور ہائی ویز پر داخلے کی ہرگز اجازت نہیں ہوگی۔ شعبہ تعلقات عامہ کی طرف سے جمعرات کو جاری بیان کے مطابق آئی جی سلمان چوہدری نے افسران کو ہدایات جاری کرتے ہوئے کہا کہ آئندہ قومی شاہرائوں پر اوورلوڈڈ گاڑیاں نظر نہیں آنی چاہئیں، وطن عزیز کی قیمتی شاہرائوں کو تباہی سے بچانے کیلئے موٹروے پولیس نے بڑا فیصلہ کیا ہے اور اس حوالے سے کسی سے کوئی رعایت نہیں برتی جائے گی۔

ایکسل لوڈ کنٹرول رجیم پر عملدرآمد یقینی بنانے کیلئے ایڈیشنل انسپکٹرز جنرل کی سر براہی میں سپیشل سکواڈ تشکیل دیئے گئے ہیں، زونل اور سیکٹر کمانڈرز سرپرائز چیکنگ اور مانیٹرنگ میں کوئی کوتاہی نہ برتیں۔

(جاری ہے)

انہوں نے مزید کہا کہ بھاری جرمانوں کے علاوہ اوورلوڈ نگ کرنے والے ٹرانسپورٹرز کے خلاف سخت قانونی کارروائی بھی عمل لائی جائے ، اس کے ساتھ ساتھ ٹائر پریشر چیکنگ کو بھی یقینی بنایا جائے۔

انسپکٹر جنرل سلمان چوہدری نے اس عزم کا اعادہ کرتے ہوئے کہا کہ ہم نے ہر حال میں قیمتی شاہرائوں اور انسانی زندگیوں کو بچانا ہے۔ نیشنل ہائی ویز اینڈ موٹروے پولیس وطن عزیز کی قومی شاہرائوں سے اوورلوڈنگ کے مکمل خاتمے کیلئے پرعز م ہے کیونکہ شاہراہیں کسی بھی ملک کی اقتصادی اور معاشی ترقی میں کلیدی کردار ادا کرتی ہیں۔ حال ہی میں اوورلوڈنگ کے خاتمے کیلئے آئی جی سلمان چوہدری نے خصوصی طور پر پورٹ قاسم اور کراچی پورٹ ٹرسٹ کے اعلی عہدیدران کے ساتھ ملاقات کرکے اوورلوڈنگ کے خاتمے کیلئے موٹروے پولیس کی طرف سے کئے گئے اقدامات سے آگاہ کیا اور ان سے اس سلسلے میں تعاون کی درخواست بھی کی ہے۔

کراچی اورملک کے دیگر بڑے شہروں سے ٹرانسپورٹ یونین اور مالکان نے اوور لوڈنگ کے خاتمے کیلئے موٹروے پولیس کی طرف سے کئے گئے اقدامات کو سر اہتے ہوئے بھر پور تعاون کی یقین دہانی کرائی ہے۔