اسلحہ وشراب برآمدگی کیس،علی امین گنڈا پور 20مئی کو ذاتی حیثیت میں طلب

اسلا م آباد(اردو پوائنٹ اخبارتازہ ترین۔17 مئی 2024 ) اسلام آباد ہائیکورٹ نے اسلحہ و شراب برآمدگی کیس میں وزیراعلیٰ خیبرپختونخوا ہ علی امین گنڈا پور کو سوالنامہ فراہم کرتے ہوئے 20 مئی کو ذاتی حیثیت میں طلب کرلیا،عدالت نے علی امین گنڈاپور سے نو سوالوں کے جواب مانگ لئے، جوڈیشل مجسٹریٹ صہیب بلال نے علی امین گنڈاپور کے وکیل ظہورالحسن کو سوالنامہ دیا۔

ڈسٹرکٹ اینڈسیشن کورٹ اسلام آباد میں وزیراعلیٰ خیبرپختونخوا کی اسلحہ، شراب برآمدگی کیس کی سماعت ہوئی۔سوالنامے میں پوچھا گیا ہے کہ کیا آپ نے سماعت کے دوران پراسیکیوشن کی جانب سے پیش کئے گئے شواہد دلائل کو سنا، سمجھا؟۔30 اکتوبر 2016 کو آپ نے ڈسٹرکٹ مجسٹریٹ کے احکامات کی خلاف ورزی کرتے ہوئے غیرقانونی اجتماع میں شرکت کی، کیا کہیں گے؟ ایک اور سوال میں پوچھا گیا ہے کہ آپ کالے رنگ کی گاڑی سے نکلے اور جنگل کا فائدہ اٹھاتے ہوئے بھاگ گئے۔

(جاری ہے)

پولیس نے گاڑی تحویل میں لے لی، کیا کہیں گے؟۔آپ کی گاڑی کی پچھلی نشست پر بلٹ پروف جیکٹ پہنے بیٹھے اللہ نواز کی تحویل سے بغیر لائسنس بندوق برآمد ہوئی، اس پر کیا کیا کہیں گے؟ آپ کی گاڑی سے غیر قانونی اسلحہ اور شراب کی ایک بوتل برآمد ہوئی، اس کا جواب دیں۔سوالنامے میں علی امین گنڈاپور سے پوچھا گیا کہ پنجاب فارنزک سائنس ایجنسی کی رپورٹ کے مطابق کیمیکل انالیسز سے ثابت ہوا کہ بوتل میں شراب تھی، کیا کہیں گے؟ آپ کے خلاف یہ مقدمہ کیوں درج ہوا اور پراسیکیوشن کے گواہان نے آپ کے خلاف کیوں گواہی دی؟ کیا آپ اپنے دفاع میں بطور گواہ دفعہ 340 کے تحت بیان دینا چاہتے ہیں؟۔

عدالت نے علی امین گنڈا پور کو 342 کا سوال نامہ فراہم کرتے ہوئے سماعت 20 مئی تک ملتوی کر دی۔عدالت نے علی امین گنڈاپور کو 20 مئی کو ذاتی حیثیت میں پیش ہونے کی بھی ہدایت کی ہے۔