فیصل آباد (اُردو پوائنٹ اخبارتازہ ترین - اے پی پی۔ 20 مئی2024ء) نظامت زرعی اطلاعات محکمہ زراعت فیصل آباد کے ترجمان نے کپاس کے کاشتکاروں کو 31مئی تک ہر صورت بجائی کا عمل مکمل کرنے اور بجائی سے پہلے لازمی سیڈ ٹریٹمنٹ کرنے کی ہدایت کی ہے۔ انہوں نے کہا کہ ایسے کاشتکار جنہوں نے ابھی تک کپاس کی کاشت نہیں کی وہ 31مئی تک ہر صورت کپا س کی بجائی مکمل کریں اور سیڈ ٹریٹمنٹ کے لئے کاشتکار امیڈا کلوپرڈ70ڈبلیو ایس بحساب10گرام فی کلوبیج استعمال کریں اور زمین کی تیاری کے وقت لیزر لینڈ لیولر کا استعمال یقینی بنائیں کیونکہ ہموار کھیت سے نہ صرف
پانی کی بچت ہوگی بلکہ جرمی نیشن بھی بہتر ہوگی اور فصل بیماریوں سے محفوظ رہے گی۔
انہوں نے کہا کہ کاشتکارکھیت میں پودوں کی مطلوبہ تعداد23تا35ہزار فی ایکڑ رکھیں نیز23ہزار پودوں کی تعداد میں پودے کا پودے سے فاصلہ9انچ جبکہ35ہزار پودوں کی تعداد میں پودے کا پودے سے فاصلہ6انچ رکھیں۔
(جاری ہے)
انہوں نے کہا کہ جڑی بوٹیوں کو ابتدائی مرحلہ میں ہی کنٹرول کیا جائے اور کاشتکار جتناممکن ہوسکے پہلا سپرے تاخیر سے کریں اورجو کپاس20تا25دن کی ہوگئی ہے اس کی چھدارئی کا عمل مکمل کریں۔
انہوں نے کہا کہ ٹرپل جین کپاس کی کاشت کی صورت میں کھیت میں جڑی بوٹیوں پر سپرے کے لئے کاشتکار پہلا سپرے پورے کھیت کی بجائے2 یا3 لائنوں پر کریں تاہم
نقصان نہ ہونے کی صورت میں پورے کھیت میں سپرے کیا جائے۔انہوں نے کہا کہ پہلے سپرے کے بعد جب بھی کھیت میں جڑی بوٹیاں نظر آئیں تو جڑی بوٹیوں کو ٹارگٹ کرکے پورے کھیت میں گلائیفوسیٹ کاسپرے کیا جائے۔
انہوں نے کہا کہ ایسے کاشتکار جنہوں نے ریتلے علاقوں میں کپاس کاشت کرنی ہے تو وہ بردار بیج ہی کاشت کریں۔انہوں نے کہا کہ کاشتکار بیج کی بہتر جرمی نیشن کے لئے کاشت سے پہلے بیج کو4تا5گھنٹے
پانی میں بھگو دیں اور صبح کے وقت کاشت کریں۔انہوں نے کہا کہ کاشتکار ڈسکی کاٹن سے بچاؤ کے لئے کلوتھیان ڈن بحساب200ملی لیٹر
پانی کی100لٹر مقدار میں ملا کر فی ایکڑ کے حساب سے کھیت میں سپرے کریں نیزجب کپاس کی فصل6انچ کی ہوجائے تو کاشتکار سفید مکھی کے
حملہ سے بچاؤ کے لئے پیلے رنگدار چپکنے والے پھندے بحساب10عدد فی ایکڑ کھیت میں مختلف جگہوں پر لگائیں،ایسی فصل جس پر ڈوڈی بننے کا عمل شروع ہے اس میں گلابی سنڈی کی مانیٹر نگ کے لئے ایک جنسی پھندہ فی5ایکڑ کے حساب سے لگائیں جبکہ گلابی سنڈی کے
حملہ سے بچاؤ کے لئے 8عدد جنسی پھندے فی ایکڑ کے حساب سے لگائیں۔
انہوں نے کہا کہ جڑی بوٹیوں کے کنٹرول اور چھدرائی کے عمل کے بعد کپاس کے کاشتکار کھادوں کا استعمال کریں تاکہ پودوں کی غذائی ضروریات پوری ہو سکیں۔علاوہ ازیں ایسی فصل جس میں پھل گڈی بننے کا عمل شروع ہے ان میں متوازن کھادوں کا استعمال کیا جائے اور مناسب
پانی لگائیں، چھدارئی کے عمل کے بعد کاشتکار ایک بوری ایس او پی اور ایک بوری ڈی اے پی کھادیں فی ایکڑ کے حساب سے دیں۔انہوں نے کہا کہ کاشتکار اگیتی کاشتہ کپاس میں 300گرام میگنیشیم سلفیٹ،150گرام آئرن سلفیٹ،15oگرام بوران اور250گرام زنک کا علیحدہ علیحدہ محلول بنا لیں اور پھرانہیں مکس کرلیں۔انہوں نے کہا کہ مؤثر افادیت کے لئے تیار شدہ محلو ل میں ایک کلو گرام یوریا کا محلول بنا کرفی ایکڑ کے حساب سے فولیئر سپرے کیا جائے۔
