چینی اہلکاروں، منصوبوں اور پروگرام کا تحفظ اور سیکیورٹی حکومت پاکستان کی اولین ترجیح ہے، احسن اقبال

اسلام آباد (اُردو پوائنٹ اخبارتازہ ترین - این این آئی۔ 21 مئی2024ء) وفاقی وزیر منصوبہ بندی احسن اقبال نے کہاہے کہ چینی اہلکاروں، منصوبوں اور پروگرام کا تحفظ اور سیکیورٹی حکومت پاکستان کی اولین ترجیح ہے۔وفاقی وزیر برائے منصوبہ بندی، ترقی و اقدامات احسن اقبال کی زیر صدارت سی پیک فیز 2 اور 13ویں جوائنٹ کوآپریشن کمیٹی کا جائزہ اجلاس منگل کے روز وزارت منصوبہ بندی میں منعقد کیا گیا۔

اجلاس میں ایڈیشنل سیکرٹری وزارت منصوبہ بندی، مختلف وزارتوں کے اعلیٰ حکام اور وفاقی و صوبائی وزارتوں کے نمائندوں نے شرکت کی، جس میں اس ہفتے منعقد ہونے والی آن لائن جے سی سی کی تیاریوں پر وزارتوں کے اعلیٰ حکام کو تفصیلی بریف کیا گیا جبکہ اجلاس میں مواصلات، انفراسٹرکچر، توانائی و اقتصادی ترقی ، زراعت سے متعلق منصوبوں نیز چینی افراد کی سیکورٹی سے متعلق بھی بات چیت کی گئی۔

(جاری ہے)

چینی افراد کی سیکورٹی کے حوالے سے بات کرتے ہوئے وفاقی وزیر احسن اقبال نے کہا کہ چینی اہلکاروں، منصوبوں اور پروگرام کا تحفظ اور سیکیورٹی حکومت پاکستان کی اولین ترجیح ہے جس کے لیے ہر طرح کا لائحہ عمل تیار کر لیا گیا ہے۔ پاکستان چینی اہلکاروں کے تحفظ کے لیے مؤثر اقدمات کرے گا۔ وفاقی وزیر احسن اقبال نے کہا کہ بغیر کسی تاخیر کے ایم ایل ون کے لیے بڈنگ کا عمل شروع کیا جائے ، ایم ایل ون کی بروقت شروعات کے لیے باقاعدہ ٹائم لائن کا تعین بھی کیا جائے۔

معدنیاتی راہداری کے حوالے سے احسن اقبال نے ہدایات جاری کرتے ہوئے کہاکہ کوشش کریں کہ معدنیات کاریڈور کا معاہدہ اسی جے سی سی میں طے پا جائے، معدنیات کے حوالے سے سب ورکنگ گروپس کی جلد از جلد چینی حکام سے میٹنگ کروائی جائے تاکہ اسی میں معدنیاتی راہداری کے منصوبوں کو زیر بحث لایا جاسکے۔