تحریک انصاف کو جلسے کی اجازت نہ دینے پر ڈپٹی کمشنر اسلام آباد کو نوٹس جاری

اسلام آباد(اردو پوائنٹ اخبارتازہ ترین۔24 مئی 2024 ) اسلام آباد ہائیکورٹ نے پاکستان تحریک انصاف کو جلسے کی اجازت نہ دینے پر ڈپٹی کمشنر اسلام آباد کو نوٹسز جاری کر دئیے ہیں،چیف جسٹس اسلام آباد ہائی کورٹ عامر فاروق نے تحریک انصاف کو اسلام آباد میں جلسے کی اجاز ت نہ دینے پرڈپٹی کمشنر اسلام آباد کے خلاف توہین عدالت کی درخواست پر سماعت کی۔درخواست گزار تحریک انصاف اسلام آباد کے صدر عامر مغل کے وکلا عدالت میں پیش ہوئے۔

اسلام آباد ہائی کورٹ نے تحریک انصاف کو اسلام آباد میں جلسے کی اجازت نہ دینے پر دائر توہین عدالت کی درخواست پر ڈپٹی کمشنر (ڈی سی) اسلام آباد کو نوٹس جاری کر کے جواب طلب کر لیا۔چیف جسٹس اسلام آباد ہائی کورٹ عامر فاروق نے ریمارکس دئیے کہ جلسے کی اجازت کون دیتا ہے، ڈپٹی کمشنر ہی دیتا ہے نہ، ہم درخواست پر نوٹس کر دیتے ہیں۔

(جاری ہے)

درخواست گزار وکیل نے استدعا کی کہ کیس کو پیر کیلئے مقرر کیا جائے، جسٹس عامر فاروق نے کہا کہ میں پیر کو موجود نہیں ہوں گا، منگل کو رکھ لیتے ہیں۔

بعد ازاں عدالت نے توہین عدالت کی درخواست پر ڈپٹی کمشنر اسلام آباد کو نوٹس جاری کرتے ہوئے منگل تک جواب طلب کر لیا۔ رہنما پی ٹی آئی عامر مغل نے عدالتی حکم کے باوجود تحریک انصاف کو جلسے کی اجازت نا دینے پر توہین عدالت کی درکواست دائر کی تھی۔خیال رہے کہ اس سے قبل بھی پاکستان تحریک انصاف کو جلسے کی اجازت نہ دینے پر سماعت کے دوران چیف جسٹس اسلام آباد ہائیکورٹ نے کہا تھا کہ پرامن اجتماع ایک آئینی حق ہے جس سے تکنیکی باتوں سے انکار نہیں کیا جا سکتا۔

27مارچ کو تحریک انصاف کو جلسے کی اجازت نہ دینے کے کیس کی سماعت چیف جسٹس عامر فاروق نے کی تھی۔چیف جسٹس نے ضلعی انتظامیہ کو ہدایت کی تھی کہ عوامی اجتماع کے انعقاد کیلئے معقول شرائط عائد کی جائیں جبکہ حکومتی وکیل نے دلائل دیتے ہوئے کہا تھا کہ سیکیورٹی خطرات کے باعث عوامی اجتماع کی اجازت نہیں دی جا سکتی۔