وزیراعلیٰ پنجاب کے انقلابی رجسٹری پروگرام کیلئے ایگزیکٹ ڈیٹا کا حصول ترجیح ہے، ڈپٹی کمشنر

بدھ 31 جولائی 2024 19:30

شیخوپورہ (اُردو پوائنٹ اخبارتازہ ترین - اے پی پی۔ 31 جولائی2024ء) وزیراعلیٰ پنجاب مریم نواز ، چیف سیکرٹری پنجاب ، کمشنر لاہور اور ڈپٹی کمشنر شیخوپوره ڈاکٹر وقار علی خان کی ہدایت پر اسسٹنٹ کمشنرز کے ضلع بھر میں قائم کیے گئے پنجاب سوشو اکنامک رجسٹری سنٹرز کے دورے جاری ۔ اسسٹنٹ کمشنرز نے مستحقین کا پی ایس ای آر کے تحت حقائق پر مبنی ڈیٹا اکٹھا کرنے کے عمل ، سائلین کے لیے بیٹھنے کا انتظامات سمیت دیگر اقدامات کا تفصیلی جائزہ لیا اور اس میں مزید بہتری کے لیے ہدایات جاری کیں ۔

ڈپٹی کمشنر شیخوپورہ ڈاکٹر وقار علی خان نے کہا کہ پنجاب سوشو اکنامک رجسٹری پروگرام کے تحت رجسٹرڈ افراد حکومت پنجاب کے ہمت کارڈ ، کسان کارڈ ، لیپ ٹاپ ، سکالرشپ پروگرام، ٹریکٹر سکیم ، مویشی کارڈ ، اپنی چھت اپنا گھر سے مستفید ہوسکیں گے ۔

(جاری ہے)

ڈپٹی کمشنر ڈاکٹر وقار علی خان نے بتایا کہ ضلع بھر میں محکمہ تعلیم ، صحت ، ریونیو ، لائیو سٹاک ، لوکل گورنمنٹ ، زراعت ، سوشل ویلفیئر سمیت دیگر محکمہ جات کی جانب سے قائم کیے گئے 398 پی ایس ای آر سنٹرز پر ابتک 47 ہزار سے زائد افراد کا ڈیٹا اکٹھا کیا جاچکا ہے ۔

ڈپٹی کمشنر ڈاکٹر وقار علی خان نے کہا کہ وزیراعلیٰ پنجاب مریم نواز کے انقلابی رجسٹری پروگرام کیلئے ایگزیکٹ ڈیٹا کا حصول ترجیح ہے ، مستحقین ضلع بھر میں قائم مراکز پر اور اپنی آن لائن بھی رجسٹریشن کروا سکتے ہیں ۔ ڈپٹی کمشنر ڈاکٹر وقار علی خان نے کہا کہ ضلع بھر کے تمام اسسٹنٹ کمشنرز ، پی ایس ای آر اور ستھرا پنجاب پروگرام کے عمل کی باقاعدہ نگرانی کریں ، رجسٹرڈ افراد کا ڈیٹا روزانہ براہ راست شیئر بھی کیاجائے ۔ معتبر اور قابل اعتماد ڈیٹا کیلئے متعین سٹاف اپنی ذمہ داریاں احسن طریقے سے انجام دے ، شفاف انداز میں حقیقی ڈیٹا کو ہرصورت یقینی بنایا جائے۔\378