یونیورسٹی آف سرگودھا میں ’’شخصیت سازی‘‘ کے موضوع پر دو مختلف ورکشاپس کا انعقاد

سرگودھا (اُردو پوائنٹ اخبارتازہ ترین - اے پی پی۔ 06 دسمبر2024ء) یونیورسٹی آف سرگودھا میں ہیومن ریسورس ڈویلپمنٹ سینٹر اور سافٹ ویئر انجینئرنگ سپیکٹرم سوسائٹی کے اشتراک سے ’’شخصیت سازی‘‘کے موضوع پر دو مختلف ورکشاپس کا انعقاد کیا گیا، ان ورکشاپس کا مقصد طلبہ کو مارکیٹ کے تقاضوں کو مدِ نظر رکھتے ہوئے پیشہ ورانہ تربیت فراہم کرنا تھا۔ اس سلسلہ میں پہلی تربیتی ورکشا پ میں آئی ٹی کمپنی ای این سی ایس نیٹ ورک کے سی ای او سلمان عابد نے سکل ڈویلپمنٹ کے مختلف پہلوؤں کا احاطہ کرتے ہوئے کہا کہ طلبہ کو انڈسٹری کی ضروریات اور اپنی صلاحیتوں کے درمیان ہم آہنگی پیدا کرنا سیکھنا ہوگا۔

یہ جاننا ضروری ہے کہ آج کی دنیا میں کامیابی کے لیے صرف ڈگری کافی نہیں بلکہ آپ کی عملی مہارتیں اور پیشہ ورانہ رویہ بھی اہم ہیں،انڈسٹری کی توقعات صرف تکنیکی مہارتوں تک محدود نہیں بلکہ اس میں ٹیم ورک، مسئلہ حل کرنے کی صلاحیت اور دباؤ میں کام کرنے کی اہلیت بھی شامل ہے۔

(جاری ہے)

انہوں نے اس بات پر زور دیا کہ وہ اپنی توقعات کو حقیقت پسندانہ بنائیں اور اپنے کیریئر کے انتخاب میں درست فیصلے کریں،آپ کو اپنے خوابوں کو پورا کرنے کے لیے خود پر یقین رکھنا ہوگا اور انڈسٹری کی توقعات کے مطابق اپنی مہارتوں کو بہتر بنانا ہوگا۔

سیلف ڈویلپمنٹ کے سلسلہ کی دوسری ورکشاپ ملک فیروز خان نون بزنس سکول ہال میں منعقد ہوئی ،جس میں ہیومن ریسورس ڈویلپمنٹ سنٹر کے کنسلٹنٹ خورشید یوسف نے کہا کہ خود شناسی ہر انسان کے لیے کامیابی کا پہلا قدم ہے،یہ جاننا کہ ہم کون ہیں، ہمارے مقاصد کیا ہیں اور ہمارے اندر کون سی صلاحیتیں پوشیدہ ہیں، ہمیں کامیابی کی طرف لے جانے والا سب سے بڑا ذریعہ ہیں۔

جدید دنیا میں جہاں مسابقت بہت زیادہ بڑھ گئی ہے، وہاں صرف وہی لوگ کامیاب ہو سکتے ہیں جو اپنی شخصیت، صلاحیتوں اور کمزوریوں کو سمجھتے ہیں اور ان پر کام کرتے ہیں۔ انہوں نے مزید کہا کہ خود شناسی کے لیے تین بنیادی ستون ہیں جن میں خود احتسابی،اپنی صلاحیتوں کا ادراک اور عملی اقدامات شامل ہیں،آج کا نوجوان اگر اپنی صلاحیتوں کو صحیح سمت میں استعمال کرے تو نہ صرف وہ اپنی ذاتی زندگی میں کامیاب ہو سکتا ہے بلکہ وہ ملک کی ترقی میں بھی اہم کردار ادا کر سکتا ہے۔

انہوں نے مزید کہا کہ یونیورسٹی آف سرگودھا ہمیشہ اپنے طلبہ کی شخصیت سازی اور پروفیشنل ترقی کے لیے ایسے مواقع فراہم کرتی رہے گی،ہم چاہتے ہیں کہ ہمارے طلبہ نہ صرف تعلیمی میدان میں بلکہ ذاتی اور سماجی زندگی میں بھی ایک نمایاں مقام حاصل کریں۔خورشیدیوسف نے پیشہ ورانہ رویوں کو فروغ دینے کے لیے طلبہ کی سافٹ ویئر انجینئرنگ سپیکٹرم سوسائٹی کو سراہا اور اس امید کاا ظہار کیا کہ وہ مستقبل میں بھی پیشہ ورانہ مہارتوں کو فروغ دینے کے لیے ایچ آر ڈی سی کے ساتھ مل کا کام کریں گے۔ اس موقع پر چیئرمین شعبہ سافٹ ویئر انجینئرنگ ڈاکٹر سمیر رضا بھی موجود تھے۔ورکشاپ کے اختتام پر انہوں نے خورشید یوسف کو یادگاری شیلڈ پیش کی۔