مویشی پال حضرات جانوروں اور مویشیوں کو سردی کے اثرات سے بچانے کیلئے مناسب اقدامات کریں ، ڈی ڈی پسرور

جمعہ 10 جنوری 2025 17:50

سیالکوٹ (اُردو پوائنٹ اخبارتازہ ترین - اے پی پی۔ 10 جنوری2025ء) ڈپٹی ڈائریکٹر لائیو سٹاک پسرور عقیل سہیل نے کہا ہے کہ سردی کی شدت میں بتدریج اضافہ اورزیادہ ترعلاقوں میں خشک موسم کے باعث دودھ دینے والے جانوروں اور مویشیوں کو سردی کے اثرات سے بچانے کیلئے مناسب اقدامات نہ ہونے کے ساتھ ساتھ سبز چارے کی کمی کے باعث دودھ کی پیداوار میں کمی ہونا شروع ہو جاتی ہےجبکہ جانوروں میں دودھ دینے کی صلاحیت کم ہوجانے کی وجہ سے عوام الناس کے لئے بھی اس کی سپلائی متاثر ہوتی ہے۔

(جاری ہے)

انہوں نے کہا کہ ماہرین لائیوسٹاک و ڈیری ڈویلپمنٹ نے لائیوسٹاک فارمرز کے ساتھ ساتھ دیگر مویشی پال حضرات کو مشورہ دیا ہے کہ وہ موسم سرما کے دوران گائیوں، بھینسوں اور دیگر دودھ دینے والے مویشیوں کو دن میں کم از کم دوبار تازہ پانی اور تازہ سبز چارے کی کمی نہ آنے دی جائے تاکہ ان کی دودھ دینے کی صلاحیت برقرار رہ سکے۔انہوں نے مزید بتایا کہ صحت کے پیش نظر سبز چارے میں گندم کا بھوسہ مکس کر کے بطور خوراک جانوروں کو دی جائے اور شدید سردی میں پرالی کے استعمال سے اجتناب کریں ۔