محکمہ تعلیم (پیکٹا) کی4 روزہ انٹرنیشنل ورکشاپ اختتام پذیر ہوگئی

جمعرات 17 اپریل 2025 20:50

لاہور (اُردو پوائنٹ اخبارتازہ ترین - اے پی پی۔ 17 اپریل2025ء) محکمہ تعلیم (پیکٹا) کی گلوبل سٹیزن شپ ان ایجوکیشن کے موضوع پر جاری انٹرنیشنل لیول کی4 روزہ ورکشاپ اختتام پذیر ہو گئی۔ورکشاپ میں شرکا کو نصاب سازی سمیت دیگر متعلقہ امور پر بین الاقوامی ماہرین تعلیم کی جانب سے ٹریننگ دی گئی۔اختتامی تقریب سے خطاب کرتے ہوئے وزیر تعلیم رانا سکندر حیات،چیف ایگزیکٹو آفیسر پیکٹا ڈاکٹر شہنشاہ فیصل عظیم،پارلیمانی سیکرٹری نوشین عدنان،سیکرٹری اسکول ایجوکیشن خالد نظیر وٹو و دیگر نے کہا کہ دنیا ایک گلوبل ویلج بن چکی ہے،پاکستان جیسے ترقی پذیر ممالک کو گلوبلائزیشن جیسے مشترکہ چیلنجز کا سامنا ہے،ان حالات میں گلوبل سٹیزن شپ ان ایجوکیشن کو فروغ دینا اہمیت اختیار کر چکا ہے۔

رانا سکندر حیات اور ڈاکٹر شہنشاہ فیصل عظیم نے جنوبی کوریا، آسٹریلیا، فلپائن اور دیگر ممالک سے آئے ہوئے تعلیمی ماہرین سے اظہار تشکر کرتے ہوئے کہا کہ وزیر اعلی مریم نواز کے وژن کے تحت تعلیمی اصلاحات کیلئے تعلیم میں ٹیکنالوجی کے انضمام اور کم وسائل رکھنے والے طلبا کیلئے وظائف جاری اقدامات کئے جا رہے ہیں۔

(جاری ہے)

ورکشاپ میں بین الاقوامی ماہرین جونگمن اوم (ڈپٹی ہیڈ، IGCED, APCEIU) پروفیسر کیون کیسٹر (سیئول نیشنل یونیورسٹی)، ڈاکٹر ایسٹر کیئر (یونیورسٹی آف میلبورن) اور لیا ایسپالارڈو شامل تھے۔

انہوں نے شرکا کو تدریسی سرگرمیاں موثر طریقے سے ادا کرنے کے ضمن میں عملی مہارات فراہم کیں۔اس موقع پر وزیر تعلیم نے شرکا میں اسناد اور بین الاقوامی ماہرین تعلیم میں یادگاری تحائف بھی تقسیم کئے۔