پسرور، کاشت کار محکمہ زراعت کے بتائے ہوئے طریقہ کار پر عمل کرتے ہوئے دھان کی پنیری کاشت کریں

منگل 20 مئی 2025 17:40

سیالکوٹ (اُردو پوائنٹ اخبارتازہ ترین - اے پی پی۔ 20 مئی2025ء) اسسٹنٹ ڈائریکٹر محکمہ زراعت(توسیع) پسرور ڈاکٹر سجاد حیدر نے کہا ہے کہ کاشتکار محکمہ زراعت کے بتائے ہوئے طریقہ سے دھان کی پنیری کاشت کریں۔ اگر دھان کی پنیری صحت مند ہوگی تو فصل اچھی پیداوار دے گی اور کسان کو منافع زیادہ حاصل ہوگا۔

(جاری ہے)

انہوں نے بتایا کہ دھان کی پنیری مشینی طریقے سے کاشت کرنے کیلئے مشین کے ذریعے ٹرے میں ایک جیسی اور ہموار مٹی کی تہہ بچھائی جاتی ہے، بچھائی گئی مٹی پر پانی کا یکساں سپرے کیا جاتا ہے تاکہ نمی مناسب ہو، چاول کے بیچ کو یکساں طریقے سے ٹرے میں ڈالا جاتا ہے، ہر ٹرے میں بیچ ڈالنے کی مقدار 50 گرام سے 350 گرام کے درمیان ہوسکتی ہے اور بیچوں کو ہلکی تہہ سے ڈھانپ دیا جاتا ہے تاکہ اگاؤ مناسب ہو۔

انہوں نے کدو کے ذریعے کاشت کرنے کیلئے بتایا کہ کھیت میں پنیری کاشت کرنے سے پہلے ایک تا دو مرتبہ خشک ہل چلا کر پانی سے بھر دیں، کھڑے پانی میں دوہرا ہل چلائیں اور سہاگہ دیں اور کھیت کو دس دس مرلے کے چھوٹے کیاروں میں تقسیم کرکے انگوری مارا بیج شام کو چھٹہ کریں۔ آخر میں انہوں نے کہا کہ کسی بھی معلومات کیلئے محکمہ زراعت کے نمائندوں سے رابطہ کریں یا پھر محکمہ زراعت کے متعلقہ نمبر پر رابطہ کریں۔