عالمی یوم انسدادِ تمباکو نوشی کے موقع پر ہیلتھ اینڈ پاپولیشن ڈیپارٹمنٹ ننکانہ صاحب کے زیر اہتمام سیمینار اور آگاہی واک کا انعقاد

اتوار 1 جون 2025 16:50

سانگلہ ہل (اُردو پوائنٹ اخبارتازہ ترین - اے پی پی۔ 01 جون2025ء) عالمی یوم انسدادِ تمباکو نوشی کے موقع پر ہیلتھ اینڈ پاپولیشن ڈیپارٹمنٹ ننکانہ صاحب کے زیر اہتمام ضلع کونسل ہال میں ایک اہم سیمینار اور آگاہی واک کا انعقاد کیا گیا۔

(جاری ہے)

تقریب کی صدارت ڈپٹی کمشنر ننکانہ صاحب جناب تسلیم اختر راؤ نے کی، جبکہ ایڈیشنل ڈپٹی کمشنر شاہد کھوکھر، سی ای او ہیلتھ ڈاکٹر طلحہ شیروانی، سی ای او ایجوکیشن میڈم شازیہ بانو ڈاکٹر کامران واجد ڈسٹرکٹ ہیلتھ آفیسر، ریسکیو 1122، لائیوسٹاک، ضلع کونسل سمیت دیگر اداروں کے سربراہان، سول سوسائٹی، طلبہ اور تاجر برادری نے بھی بھرپور شرکت کی۔

سیمینار سے خطاب کرتے ہوئے شرکا نے تمباکو نوشی کے انسانی صحت پر مہلک اثرات، اس سے وابستہ بیماریوں اور معاشرتی نقصان پر روشنی ڈالی۔ ڈاکٹر طلحہ شیروانی نے کہا کہ تعلیمی اداروں، ہسپتالوں اور عوامی مقامات پر سگریٹ، گٹکا، چھالیہ اور دیگر نشہ آور اشیاء کی فروخت پر مکمل پابندی ہونی چاہیے تاکہ نئی نسل کو ان مضر عادات سے محفوظ رکھا جا سکے۔ پروگرام کے آخر میں ضلع کونسل ہال سے گردوارہ جنم استھان تک آگاہی واک کا اہتمام کیا گیا، جس میں شرکاء نے پلے کارڈز اور بینرز کے ذریعے تمباکو نوشی کے خلاف شعور اجاگر کیا۔