خیبرپختونخوا میں چائے کی پیداوار کو تجارتی بنیادوں پر فروغ کیلئے اہم اجلاس

کے پی بورڈ آف انویسٹمنٹ اینڈ ٹریڈ کے حکام اور ایف اے او کے نمائندوں کی شرکت

پیر 15 ستمبر 2025 20:10

خیبرپختونخوا میں چائے کی پیداوار کو تجارتی بنیادوں پر فروغ کیلئے اہم ..

پشاور(اُردو پوائنٹ اخبارتازہ ترین - این این آئی۔ 15 ستمبر2025ء) خیبرپختونخوا میں چائے کی پیداوار کو تجارتی بنیادوں پر فروغ دینے کے لیے اقوام متحدہ کے ادارہ برائے خوراک و زراعت (ایف اے او) کے صوبائی دفتر کی سربراہ مس Kiyal Akmatbek کی قیادت میں ایک وفد نے خیبرپختونخوا بورڈ آف انویسٹمنٹ اینڈ ٹریڈ کا دورہ کیا ۔اس موقع پر بورڈ حکام اور ایف اے او کا ایک تفصیلی اجلاس منعقد ہوا۔

وفد میں انٹرنیشنل ٹی ایکسپرٹ John Snellاور نیشنل کنسلٹنٹس بھی شامل تھے۔ اجلاس میں خیبرپختونخوا کے صنعت وحرفت اور فنی تعلیم و سی ای او کے پی بی او آئی ٹی مسعود احمد اور وائس چئرمین کے پی بی او آئی ٹی حسن مسعود کنور نے شرکت کی۔بورڈ کے دیگر افسران بھی اجلاس میں موجود تھے۔اجلاس میں خیبرپختونخوا میں چائے کی پیداوار کے لیے مجوزہ بزنس ماڈل اور جامع منصوبہ بندی پر پیش رفت کا جائزہ لیا گیا اور اس شعبے میں نجی سرمایہ کاری کے امکانات پر بھی تفصیلی غور کیا گیا۔

(جاری ہے)

اس موقع پر پالیسی اصلاحات کی ضرورت اور پبلک پرائیویٹ پارٹنرشپ (پی پی پی) کے فروغ پر بھی زور دیا گیا۔دونوں فریقوں نے چائے کے شعبے میں پائیدار ترقی کے لیے مشترکہ تعاون، ویلیو چین ڈویلپمنٹ اور استعداد کار بڑھانے کے عزم کا اعادہ کیا۔اجلاس کے اختتام پر کے پی بی او آئی ٹی اور ایف اے او کے مابین قریبی روابط برقرار رکھنے اور صوبے میں چائے کی تجارتی پیداوار سے متعلق منصوبوں کے مؤثر نفاذ اور اقدامات پر اتفاق کیا گیا۔