محکمہ زراعت نے کپاس کے کاشتکاروں کیلئے آبپاشی کا شیڈول جاری کردیا

بدھ 4 جون 2025 13:12

فیصل آباد (اُردو پوائنٹ اخبارتازہ ترین - اے پی پی۔ 04 جون2025ء) محکمہ زراعت نے کپاس کے کاشتکاروں کیلئے آبپاشی کا شیڈول جاری کیاہے اور کہا ہے کہ ڈرل سے لائنوں میں کاشت کی گئی روائتی چھوٹے قد والی کپاس کی اقسام کو پہلی آبپاشی بوائی کے 30 سے 40دن اور لمبے قد والی کپاس کی اقسام کو 40 سے 50دن اور اس کے بعد ہر آبپاشی 12 سے 15 دن کے وقفہ سے کرنی چاہیے جبکہ بی ٹی اقسام کیلئے بوائی کے بعد نائٹروجنی کھاد کا چھٹا حصہ 30سے35دن بعد جبکہ باقی ماندہ نائٹروجن کھاد ایک پانی چھوڑ کر اگلے پانی پر ڈالنی چاہیے۔

ڈائریکٹر محکمہ زراعت توسیع فیصل آباد خالد محمود نے کہا کہ کپاس کے کاشتکاروں کو لائنو ں میں بی ٹی اقسام کی کاشت کے بعد پہلی آبپاشی 30سے 35دن کے وقفہ سے کرنے کی ہدایت کی گئی ہے اسلئے کاشتکار پہلی آبپاشی مقررہ وقت پر یقینی بنائیں جبکہ بقیہ آبپاشیاں 12 سے15 دن کے وقفہ سے کی جائیں تاہم پٹڑیوں پر کاشت کی صورت میں بوائی کے بعد پودے کو پانی کی کمی نہیں ہونے دینی چاہیے اور ہر 6 سے9دن کے وقفہ سے پانی لگاتے رہنا چاہیے تاکہ پودے کو پانی کی کمی کی علامات سے بچایاجاسکے۔

(جاری ہے)

انہوں نے کہاکہ روائتی اقسام کیلئے بوائی کے بعد نائٹروجن کھاد کابقیہ تیسرا حصہ ڈوڈیاں بننے پر اور باقی ماندہ نائٹروجن پھول شروع ہونے پر استعمال کی جائے۔ انہوں نے کہاکہ کھیتوں میں اور ارد گرد پائی جانیوالی سفید مکھی، ملی بگ اور لیف کرل وائرس کے میزبان پودوں کا کام دینے والی جڑی بوٹیاں بھی بروقت تلف کردینی چاہئیں تاکہ کپاس کی فصل کو نقصان نہ پہنچ سکے۔