زیتوں کی زیادہ سے زیادہ رقبہ پر کاشت کرکے خوردنی تیل کی ملکی ضروریات پوری کی جاسکتی ہیں،ماہرین جامعہ زرعیہ

منگل 22 جولائی 2025 13:09

مکوآنہ(اُردو پوائنٹ اخبارتازہ ترین - این این آئی۔ 22 جولائی2025ء)جامعہ زرعیہ فیصل آبادکے زرعی ماہرین نے کاشتکاروں کو خوردنی تیل کی ملکی ضروریات پوری کرنے کیلئے زیادہ سے زیادہ رقبہ پر زیتون کاشت کرنے کی ہدایت کی ہے اور کہاہے کہ زیتون کی کاشت کو فروغ دیکر جہاں اربوں روپے کا قیمتی زرمبادلہ بچایاجاسکتاہے وہیں قومی ضروریات پوری کرنے کے بعد اضافی پیداوار برآمد بھی کی جا سکتی ہے۔

(جاری ہے)

انہوں نے کہاکہ زیتون کی کاشت کیلئے گرم و معتدل درجہ حرارت انتہائی موزوں ہے لہذا ایسے علاقے جہاں زیادہ سردی نہ پڑتی ہووہاں زیتون کو با آسانی کاشت کیاجاسکتاہے۔ انہوں نے کہاکہ زیتون میں کلیاں بننے کیلئے موسم سرما کے دوران روزانہ درجہ حرارت کااتار چڑھا ایک سے 15 ڈگری سینٹی گریڈ ہونا ضروری ہے تاہم پھول بننے کے بعد سردی زیتون کی فصل کو متاثر کر سکتی ہے۔ انہوں نے کہاکہ کاشتکار زیتون کی کاشت کیلئے مزید رہنمائی کی غرض سے ماہرین زراعت یا محکمہ زراعت کے فیلڈ سٹاف کی خدمات سے بھی استفادہ کرسکتے ہیں۔