عمران خان کو اپنی بے گناہی ثابت کرنے کیلئے منصفانہ موقع دیا گیا، پولی گرافک ٹیسٹ سے انکار ٹرائل سے بچنے کی کوشش ہے ، عدالت

لاہور(اردوپوائنٹ اخبار تازہ ترین۔16جون 2025)لاہور کی انسداد دہشتگردی عدالت نے بانی پی ٹی آئی عمران خان کے پولی گرافک اور فوٹو گرامیٹک ٹیسٹ سے متعلق پراسیکیوشن کی درخواست پر تین صفحات پر مشتمل تحریری فیصلہ جاری کر دیا،عدالت نے قرار دیا کہ بانی پی ٹی آئی کو خود کو بے گناہ ثابت کرنے کیلئے منصفانہ موقع دیا گیا لیکن ان کی ضد اور مسلسل انکار کے باعث کوئی نتیجہ حاصل نہ ہو سکا۔

تین صفحات پر مشتمل یہ فیصلہ اے ٹی سی کے جج نے جاری کیا جس میں عدالت نے بانی پی ٹی آئی عمران خان کو معصوم ثابت کرنے کے دو مواقع دئیے جانے کا ذکر کیا اور کہا کہ عدالت یہ قانونی نکتہ سمجھنے سے قاصر ہے کہ تفتیش کیسے مکمل ہوگی جب ملزم ہی تعاون نہ کرے۔ پراسیکیوشن کی جانب سے بانی پی ٹی آئی کے پولی گرافک اور فوٹو گرامیٹک ٹیسٹ کیلئے باقاعدہ درخواست دائر کی گئی تھی جس پر اب عدالت نے یہ فیصلہ جاری کر دیا ہے۔

(جاری ہے)

عدالت نے اپنے فیصلے میں لکھا کہ ایک عام ملزم کو ایسے ٹیسٹ سے انکار کا موقع نہیں دیا جاتا جبکہ موجودہ ملزم (عمران ں ان) نے نہ صرف ٹیسٹ کروانے سے انکار کیا بلکہ تفتیشی ٹیم سے ملاقات سے بھی گریز کیا، عدالت نے اظہار تعجب کیا کہ ایسی صورتحال میں تفتیش مکمل کیسے کی جا سکتی ہے؟۔جج منظر علی گل نے فیصلے میں مزید کہا کہ اگرچہ ملزم کے وکیل کی اس بات سے اتفاق ہے کہ عدالت کسی کو زبردستی ٹیسٹ کروانے پر مجبور نہیں کر سکتی لیکن ملزم کا مسلسل انکار تفتیشی عمل میں رکاوٹ ہے۔

عدالت نے ہدایت دی کہ تفتیشی افسران اس معاملے میں تفتیش کو تکنیکی بنیادوں پر مکمل کریں۔ عدالتی فیصلے میں کہا گیا کہ عام ملزم ٹیسٹ سے انکار نہیں کر سکتا لیکن بانی پی ٹی آئی نے دونوں مواقع ضائع کئے۔عدالت کے پاس ایسا کوئی اختیار یا مشینری نہیں جس سے زبردستی ٹیسٹ کروایا جا سکے۔ تیسرا موقع دینے کی ضرورت نہیں۔ عدالت کو مثبت نتیجے کی امید نہیں رہی۔

فیصلے میں کہا گیا کہ عدالت کو یہ محسوس ہوتا ہے کہ بانی پی ٹی آئی ان ٹیسٹوں سے انکار کر کے ٹرائل سے بچنے کی کوشش کر رہے ہیں۔ عدالت نے بانی پی ٹی آئی کو ٹیسٹ کروانے کیلئے دو مواقع فراہم کئے تھے لیکن دونوں مرتبہ انہوں نے انکار کیا، اس بنیاد پر عدالت نے واضح کیا ہے کہ اب انہیں تیسرا موقع نہیں دیا جائے گا کیونکہ عدالت کو اس حوالے سے کوئی مثبت نتیجہ نکلنے کی امید نہیں ہے۔عدالت نے واضح کیا کہ بانی پی ٹی آئی کی جانب سے عدم تعاون ظاہر کرتا ہے کہ وہ تفتیشی عمل میں شامل ہونے سے اجتناب برت رہے ہیں۔ تحریری فیصلے میں عدالت نے ہدایت کی کہ تفتیشی افسران تکنیکی بنیادوں پر تفتیش کو مکمل کریں۔