نائب وزیراعظم محمد اسحاق ڈار کی زیر صدارت اجلاس ، اشیائے خوردونوش خاص طور پر چینی کی قیمتوں اور سپلائی کا جائزہ لیا گیا

جمعہ 27 جون 2025 19:44

اسلام آباد (اُردو پوائنٹ اخبارتازہ ترین - اے پی پی۔ 27 جون2025ء) نائب وزیر اعظم اور وزیر خارجہ سینیٹر محمد اسحاق ڈار نے اشیائے خوردونوش خاص طور پر چینی کی قیمتوں اور سپلائی کا جائزہ لینے کے لیے جمعہ کو یہاں ایک فالو اپ اجلاس کی صدارت کی۔

(جاری ہے)

نائب وزیر اعظم کے آفس سے جاری بیان کے مطابق اجلاس میں نیشنل فوڈ سکیورٹی کے وزیر، وزیر اعظم کے معاون خصوصی طارق باجوہ، فوڈ سکیورٹی و صنعتوں کے سیکریٹریز اور دیگر سینئر سرکاری افسران نے شرکت کی۔

کمیٹی نے چینی کے شعبے کے اہم پہلوئوں کا جائزہ لیا جن میں ملکی پیداوار، درآمدی ضروریات، سپلائی چین کی کارکردگی اور مارکیٹ میں دستیابی شامل ہے۔ کمیٹی نے 0.5 ملین ٹن چینی کی درآمد کی اصولی منظوری کا بھی فیصلہ کیا۔ نائب وزیر اعظم اور وزیر خارجہ نے صارفین اور سپلائرز دونوں کے مفادات کے تحفظ کے لیے حکومت کے عزم کا اعادہ کیا اور کہا کہ اس بات کو یقینی بنایا جائے گا کہ ضروری اشیاء سستی اور قابل رسائی رہیں۔