این اے138 پاکپتن سے امیدوار راو عمر ہاشم کی جانب سے دائر الیکشن پیٹیشن منظور

منگل 1 جولائی 2025 16:08

لاہور (اُردو پوائنٹ اخبارتازہ ترین - اے پی پی۔ 01 جولائی2025ء) الیکشن ٹربیونل لاہور نے این اے 138 پاکپتن سے پی ٹی آئی حمایت یافتہ امیدوار راو عمر ہاشم کی جانب سے دائر الیکشن پیٹیشن منظور کر لی۔ ٹربیونل نے مسلم لیگ (ن) کے کامیاب امیدوار احمد رضا مانیکا کی جانب سے دائر اعتراضات مسترد کر تے ہوئے سماعت ملتوی کردی۔ ٹربیونل نے فیصلے میں کہا ہے کہ احمد رضا مانیکا نے پیٹیشن پر دو اعتراضات عائد کیے تھے، جن میں موقف اختیار کیا گیا تھا کہ پیٹیشن دائر کرتے وقت درخواست گزار خود موجود نہیں تھا اور پیٹیشن کے ساتھ گواہوں کی فہرست اور بیانِ حلفی منسلک نہیں تھا۔

الیکشن ٹربیونل کے جسٹس انوار حسین نے 9 صفحات پر مشتمل تحریری فیصلہ جاری کرتے ہوئے قرار دیا کہ الیکشن ایکٹ کے تحت پیٹیشن دائر کرتے وقت درخواست گزار کا خود موجود ہونا ضروری نہیں، بلکہ وہ اتھارٹی لیٹر کے ذریعے بھی پیٹیشن دائر کر سکتا ہے۔

(جاری ہے)

موجودہ کیس میں درخواست گزار نے سمیر کھوسہ ایڈووکیٹ کو اتھارٹی لیٹر جاری کیا تھا۔فیصلے کے مطابق پیٹیشن کے ساتھ گواہوں کی فہرست اور بیانِ حلفی بھی موجود تھا، لہذا احمد رضا مانیکا کے اعتراضات بے بنیاد اور قانون کے منافی قرار دیے گئے، الیکشن ٹربیونل نے اعتراضات مسترد کرتے ہوئے آئندہ سماعت پر فریقین کو مزید کارروائی کے لیے طلب کر لیا ۔