سعودی عرب اور فرانس نے سکیورٹی تعاون سے متعلق ایگزیکٹیو دستاویز پر دستخط کر دیئے

منگل 29 جولائی 2025 10:10

پیرس (اُردو پوائنٹ اخبارتازہ ترین - اے پی پی۔ 29 جولائی2025ء) سعودی وزیرداخلہ شہزادہ عبدالعزیز بن سعود بن نایف نےاپنے فرنسیسی ہم منصب برونو ریٹیلیو سے پیرس میں ملاقات کی ،جس میں دونوں ممالک کے وزرائے داخلہ نے سکیورٹی تعاون سے متعلق ایگزیکٹیو دستاویز پر دستخط کئے۔ اردو نیوز کے مطابق ملاقات میں دونوں مما لک کے درمیان سکیورٹی سے متعلق متعدد امور پر تبادلہ خیال کیا گیاجن میں منظم جرائم، منشیات کی سمگلنگ اور منی لانڈرنگ کے نیٹ ورکس کا مقابلہ کرنے کے ساتھ ساتھ دونوں ممالک کے درمیان مہارت کے تبادلے کو بڑھانا شامل ہے۔

(جاری ہے)

اس موقع پر سعودی وزیرداخلہ شہزادہ عبدالعزیز بن سعود بن نایف نے کہا کہ ملاقات کا مقصد سعودی قیادت کی ہدایات پر عمل درآمد کرتے ہوئے دونوں ممالک کے درمیان سکیورٹی تعاون کو بڑھانا ہے۔ انہوں نے خطرات سے نمنٹے کے لئے فرانس کے ساتھ مشترکہ کوششوں کو بڑھانے کے لئے مملکت کے عزم کا اعادہ کیا ۔ سعودی وزیر داخلہ نے اپنے فرانسیسی ہم منصب کو فرانس کے قومی دن کے موقع پر مبارکباد بھی دی۔ اس موقع پر معاون وزیر داخلہ ڈاکٹر ھشام بن عبدالرحمن الفالح، فرانس میں سعودی سفیر فہد بن معیوف الرویلی اور دیگر اعلی عہدیدار بھی موجود تھے۔