امریکا، یونائیٹڈ ایئرلائنز کے مسافر طیارے کا ٹیک آف کرتے ہی انجن فیل، ہنگامی لینڈنگ

بدھ 30 جولائی 2025 09:10

نیویارک (اُردو پوائنٹ اخبارتازہ ترین - اے پی پی۔ 30 جولائی2025ء) امریکا کی یونائیٹڈ ایئرلائنز کے مسافر طیارے بوئنگ 787 ڈریم لائنرکا انجن پرواز بھرنے کے بعد فیل ہو گیا جس کے بعد پائلٹ نے ’مے ڈے‘ کی کال دی اور طیارے کو ہنگامی لینڈنگ کرنا پڑی۔اے پی کے مطابق میونخ جانے والی یونائیٹڈ ایئرلائنز کی پرواز نے 25 جولائی کو اپنے طے شدہ ٹرانس اٹلانٹک سفر پر واشنگٹن ڈلس ہوائی اڈے سے ٹیک آف کیا لیکن اس کا بایاں انجن فیل ہو گیا۔

(جاری ہے)

پرواز کے واشنگٹن ڈلس سے روانہ ہونے اور پانچ ہزار فٹ کی بلندی پر پہنچنے کے فوراً بعد انجن میں خرابی کی اطلاع ملی۔ عملے نے جلد ہی ہنگامی حالت کا اعلان کیا اور محفوظ ہنگامی لینڈنگ کو یقینی بنانے کے لیے ایئر ٹریفک کنٹرولرز کے ساتھ رابطہ کیا۔’فلائٹ ایئر ویوز‘ کے مطابق ہوائی جہاز دو گھنٹے 38 منٹ تک فضا میں رہا اور واشنگٹن کے شمال مغرب میں ایک ہولڈنگ پیٹرن میں چکر لگاتا رہا تاکہ واشنگٹن ڈلس ایئرپورٹ پر واپس اترنے سے پہلے ایندھن کو ختم کیا جا سکے۔اس واقعے میں کوئی جانی نقصان نہیں ہوا اور توقع ہے کہ ایئر لائن اور متعلقہ ایوی ایشن حکام کی جانب سے تکنیکی خرابی کی مزید تحقیقات کی جائیں گی۔