سینیٹر اعظم نذیر تارڑ سے ملتان ہائی کورٹ بار ایسوسی ایشن سمیت جنوبی پنجاب کی بار ایسوسی ایشنز کے وفود کی ملاقات

جمعہ 1 اگست 2025 17:43

اسلام آباد (اُردو پوائنٹ اخبارتازہ ترین - اے پی پی۔ 01 اگست2025ء) وفاقی وزیر قانون و انصاف سینیٹر اعظم نذیر تارڑ سے ملتان ہائی کورٹ بار ایسوسی ایشن سمیت جنوبی پنجاب کی بار ایسوسی ایشنز کے وفود نے ملاقات کی۔ ملاقات میں وکلاء کی فلاح و بہبود، بار ایسوسی ایشنز کو درپیش مسائل اور ان کے مؤثر حل پر تفصیلی بات چیت کی گئی۔وزارت قانون و انصاف کے مطابق ملتان ہائی کورٹ بار کے صدر نے وکلاء برادری کے لئے کئے گئے حکومتی اقدامات پر وزیرِ قانون کا شکریہ ادا کیا اور کہا کہ وزارتِ قانون کا کردار قابلِ تحسین ہے۔

وفاقی وزیر قانون نے تمام نمائندگان سے گفتگو کرتے ہوئے اس بات پر زور دیا کہ بار کی سیاست کو بارز تک محدود رکھا جانا چاہئے تاکہ عدلیہ اور وکلاء کا ادارہ غیر جانبدار اور خودمختار حیثیت برقرار رکھ سکے۔

(جاری ہے)

انہوں نے کہا کہ وزارتِ قانون وکلاء کی فلاح و بہبود کو اپنی ترجیحات میں سرفہرست رکھتی ہے اور ان کے جائز مسائل کے حل کے لئے ہر ممکن تعاون فراہم کرے گی، ای لائبریریز اور سوالرائزیشن پراجیکٹس حکومت پنجاب کے تعاون سے جاری ہیں۔

وزیرِ قانون نے کہا کہ کورٹ فیس کا دیرینہ مسئلہ وزیرِ اعلیٰ پنجاب مریم نواز شریف کی ہدایت پر حل کر دیا گیا ہے۔ ملاقات میں شجاع آباد، جہانیاں، لودھراں، دنیا پور، ڈیرہ غازی خان، کوٹ ادو، راجن پور، مظفرگڑھ، علی پور، جتوئی، جلال پور، کبیر والا اور بورے والا بارز کے صدور اور نمائندگان نے بھی شرکت کی اور اپنے اپنے علاقوں میں وکلاء کو درپیش مسائل سے وزیر قانون کو آگاہ کیا۔وزیر قانون سینیٹر اعظم نذیر تارڑ نے تمام بار نمائندگان کو یقین دہانی کرائی کہ ان کے مسائل کو ترجیحی بنیادوں پر حل کیا جائے گا اور بارز کے ساتھ رابطے کو مزید مستحکم بنایا جائے گا۔