عائشہ عمر کو ڈیٹنگ شو ’لازوال عشق‘ پر تنقید کا سامنا، پابندی کے مطالبے پر پیمرا کا مؤقف بھی آگیا

یہ ڈیٹنگ ریئلٹی شو یوٹیوب پر اسٹریم کیا جائے گا جو انٹرنیٹ استعمال کرنے والے ہر شخص کے لیے دستیاب ہوگا

ساجد علی منگل 16 ستمبر 2025 16:49

عائشہ عمر کو ڈیٹنگ شو ’لازوال عشق‘ پر تنقید کا سامنا، پابندی کے مطالبے ..

لاہور ( اُردو پوائنٹ اخبارتازہ ترین۔ 16 ستمبر2025ء ) معروف میزبان و اداکارہ عائشہ عمر کو ڈیٹنگ شو ’لازوال عشق‘ پر تنقید کا سامنا ہے جس پر پابندی کا مطالبہ کیا جارہا ہے اور اس معاملے پر پیمرا کا مؤقف بھی آگیا۔ تفصیلات کے مطابق سوشل میڈیا پر ان دنوں اداکارہ عائشہ عمر کی میزبانی میں شروع ہونے والے ایک متنازعہ ڈیٹنگ شو کا ٹیزر جاری کیا گیا ہے، جس میں کہا جارہا ہے کہ عائشہ عمر پاکستان کے پہلے ڈیٹنگ شو ’لازوال عشق‘ کی میزبانی کرنے جارہی ہیں، جس میں شریک ہوکر آپ سچا عشق تلاش کرسکتے ہیں، آپ اپنا سارا وقت اس شاندار گھر میں گزاریں گے جہاں ہر لمحہ کیمروں میں ریکارڈ کیا جائے گا، اس گھر میں تفریح کی سہولیات بھی ہیں جہاں لوگ بہت اچھا وقت گزاریں گے اور رشتوں کو چیلنجنگ کے طور پر لیں گے، جیتنے والا کپل ایک عظیم الشان انعام جیتے گا۔

(جاری ہے)

View this post on Instagram

معلوم ہوا ہے کہ یہ ڈیٹنگ ریئلٹی شو یوٹیوب پر اسٹریم کیا جائے گا، یہ یوٹیوب اوریجنلز کا خصوصی شو نہیں، یہ پروگرام انٹرنیٹ استعمال کرنے والے ہر شخص کے لیے دستیاب ہوگا، تاہم صارفین کی جانب سے اس شو پر تنقید کی جارہی ہے اور پیمرا میں اس کی بندش کیلئے درخواست بھی دائر ہوئی، جس میں کہا گیا ہے کہ غیر اسلامی و غیر اخلاقی مواد نوجوانوں کو گمراہ کر رہا ہے، یوٹیوب پر نشر ہونے والا شو پاکستانی اقدار اور روایات کے خلاف ہے، معاشرتی اور خاندانی نظام کو تباہ کرنے والی مواد ناقابل قبول ہے، درآمدی فارمیٹ فحاشی اور بے راہ روی کو فروغ دیتا ہے، پیمرا اور پی ٹی اے سے سخت نگرانی کا مطالبہ کیا جاتا ہے۔

pic.twitter.com/qfmNkrum9F
— Report PEMRA (@reportpemra) September 16, 2025

اس معاملے پر پیمرا کی جانب سے وضاحت جاری کرتے ہوئے کہا گیا ہے کہ عوام الناس کی اطلاع کے لیے یہ واضح کیا جاتا ہے کہ ’لازوال عشق‘ کے حوالے سے سوشل میڈیا مہم پر پیمرا کو متعدد شکایات موصول ہو رہی ہیں، تاہم یہ سوشل میڈیا پلیٹ فارم پر نشر کیا جانے والا مواد ہے، یہ پروگرام پیمرا سے لائسنس یافتہ کسی بھی ٹی وی چینل پر نشر نہیں کیا جا رہا، پیمرا قوانین کا اطلاق پیمرا سے لائسنس یافتہ ٹی وی چینلز پر ہوتا ہے۔