ایل ڈی اے کا تجاوزات کے خلاف آپریشن، تین قیمتی پلاٹ واگزار کروا لیے

پیر 11 اگست 2025 20:10

لاہور (اُردو پوائنٹ اخبارتازہ ترین - اے پی پی۔ 11 اگست2025ء) لاہور ڈویلپمنٹ اتھارٹی نے مشترکہ ٹیموں کے ساتھ آپریشن کرتے ہوئے تین قیمتی پلاٹ واگزار کروا لیے۔ ایل ڈی اے ایونیوون میں پیرا اور ایل ڈی اے ٹیموں نے آپریشن کے دوران پلاٹ نمبر 658، 659، 660 بلاک بی ایونیو ون واگزار کروائے۔ڈائریکٹر ایونیو ون عمر صہیب نے آپریشن کی نگرانی کی۔واگزار کروائے گئے پلاٹوں کی مالیت 6کروڑ روپے سے زائد ہے۔

واگزار کروائے گئے پلاٹوں پر 21سال سے غیرقانونی قبضہ تھا۔ غیرقانونی کمرشل عمارتوں، کمرشل فیس نادہندگان املاک کے خلاف جاری آپریشن میں ایل ڈی اے ٹیموں نے مختلف سکیموں اور ایل ڈی اے کنٹرولڈ ایریا میں آپریشن کرکے88املاک سربمہرکر دیں۔ایل ڈی اے ٹیموں نے گلبرگ، فیصل ٹان،گلشن راوی، جی ٹی روڈ، وحدت روڈ، سبزہ زار میں آپریشن کیا۔

(جاری ہے)

غیرقانونی کمرشل استعمال، کمرشل فیس کی عدم ادائیگی پرگلبرگ، فیصل ٹائون میں 21املاک، گلشن راوی، جی ٹی روڈ،ایک موریہ پل تا ویٹ مین روڈ پر32املاک سیل کر دیں۔

ٹیموں نے ریکوری آپریشن کے دوران وحدت روڈ، سبزہ زار میں 35املاک سیل کر دیں۔ سیل کی گئی املاک میں نجی سکول، کلینک، ورکشاپ، لیبارٹری، سیلون، فوڈ پوائنٹ،ملک شاپ، دکانیں، دفاتر ودیگر شامل ہیں۔ آپریشن چیف ٹاون پلانرون اسد الزمان کی زیر نگرانی کیا گیا۔ڈی جی ایل ڈی اے کی ہدایت پرغیرقانونی کمرشل عمارتوں،قبضہ مافیا، کمرشل فیس نادہندگان املاک کے خلاف بلاامتیاز کارروائیاں جاری ہیں۔