راولپنڈی، 70 سالہ بزرگ ہنی ٹریپ کا شکار، ایک کروڑ روپے اور آئی فونز بطور تاوان طلب

ڈاکوؤں نے مغوی کے بینک اکاؤنٹ سے تین لاکھ روپے بھی نکلوا لیے ہیں، مقدمہ درج کرکے تفتیش کی جارہی ہے، پولیس

ہفتہ 4 اکتوبر 2025 20:15

راولپنڈی، 70 سالہ بزرگ ہنی ٹریپ کا شکار، ایک کروڑ روپے اور آئی فونز ..

راولپنڈی(اُردو پوائنٹ اخبارتازہ ترین - این این آئی۔ 04 اکتوبر2025ء)مورگاہ کے رہائشی 70 سالہ بزرگ ہنی ٹریپ کا شکار ہو کر کچے کے ڈاکوؤں کے ہتھے چڑھ گئے اور ڈاکوؤں نے بزرگ محمود بیگ کی ہتھکڑیوں میں جکڑی ویڈیو وٹس ایپ کے ذریعے ان کے گھروالوں کو بھجوا کر بھاری تاوان طلب کرلیا۔

(جاری ہے)

راولپنڈی پولیس کے مطابق بزرگ شہری کو اغوا کرنے والے ڈاکوؤں نے ایک کروڑ روپے نقد، دو آئی فون اور دو گھڑیاں بطور تاوان طلب کی ہیں، ڈاکوؤں نے مغوی محمود بیگ کے بینک اکاؤنٹ سے تین لاکھ روپے بھی نکلوا لیے ہیں۔

پولیس نے بتایا کہ مغوی کے بیٹے ماجد قریشی کی درخواست پر تھانہ مورگاہ میں مقدمہ درج ہوچکا ہے۔مغوی کے بارے میں پولیس نے بتایا کہ بزرگ محمود بیگ کو 16 ستمبر کو راولپنڈی سے ملتان بلایا گیا اور پھر اغوا کرلیا گیا اور محمود بیگ اپنی موٹر سائیکل ملتان ریلوے اسٹیشن کے قریب دوست کے گھر میں کھڑی کر کے روانہ ہوئے تھے۔پولیس نے بتایا کہ یکم اکتوبر کو ایف آئی آر درج کرنے کا فیصلہ کیا اور تفتیش کی جارہی ہے۔