چین، مصنوعی ذہانت کی محبت میں گرفتار 75 سالہ شخص نے بیوی سے طلاق مانگ لی

ہفتہ 16 اگست 2025 17:49

بیجنگ(اُردو پوائنٹ اخبارتازہ ترین - این این آئی۔ 16 اگست2025ء)چین سے ایک غیر معمولی واقعہ سامنے آیا ہے جہاں 75 سالہ شخص نے مصنوعی ذہانت کی مدد سے تخلیق کردہ لڑکی سے محبت میں مبتلا ہو کر اپنی بیوی سے طلاق کا مطالبہ کر دیا۔ غیر ملکی میڈیا رپورٹس کے مطابق بزرگ شہری جن کا نام جیانگ ہے، سوشل میڈیا پر برازنگ کے دوران ایک خاتون کے ڈیجیٹل اوتار سے متعارف ہوئے اور اس سے محبت کر بیٹھے۔

جیانگ کو اندازہ نہ ہوا کہ یہ تصویر اور شخصیت اصلی نہیں بلکہ جعلی ہے، وہ معمول کے مطابق اس چیٹ بوٹ سے چیٹ کرنے لگے۔

(جاری ہے)

میڈیا رپورٹس کے مطابق وقت گزرنے کے ساتھ ورچوئل لڑکی سے بات کرنا ان کی روزمرہ زندگی کا حصہ بن گیا، جیانگ گھنٹوں موبائل فون پر مصروف رہتے اور اپنی اے آئی محبوبہ کے نئے پیغامات کا انتظار کرتے۔میڈیا رپورٹس کے مطابق ایک دن جیانگ کا اپنی بیوی کے ساتھ فون پر زیادہ وقت گزارنے کے معمول پر جھگڑا ہوا جس پر جیانگ نے اپنی حقیقی شریکِ حیات کو چھوڑ کر ورچوئل رفاقت کو ترجیح دینے کا فیصلہ کیا۔

تاہم ان کے بچوں نے معاملے میں مداخلت کرتے ہوئے والد کو سمجھایا کہ جس لڑکی سے وہ محبت کا دعوی کر رہے ہیں وہ دراصل ایک نیورل نیٹ ورک یعنی کہ مصنوعی ذہانت کی تخلیق کے سوا کچھ نہیں ہے، یوں جیانگ کو حقیقت کا ادراک ہوا۔