کمشنر ہزارہ کی زیر صدارت ڈینگی کی روک تھام سے متعلق ویڈیو لنک اجلاس، اضلاع کو مؤثر اقدامات کی ہدایت

پیر 15 ستمبر 2025 20:10

پشاور(اُردو پوائنٹ اخبارتازہ ترین - این این آئی۔ 15 ستمبر2025ء) کمشنر ہزارہ ڈویژن فیاض علی شاہ کی زیر صدارت ڈینگی کی موجودہ صورتحال اور حفاظتی اقدامات کے جائزے کے لیے ویڈیو لنک اجلاس منعقد ہوا، جس میں تمام ڈپٹی کمشنرز اور ڈسٹرکٹ ہیلتھ آفیسرز نے شرکت کی۔اجلاس میں کمشنر ہزارہ نے تمام اضلاع کی تیاریوں اور انتظامات کا تفصیلی جائزہ لیا اور مؤثر اقدامات یقینی بنانے کے لیے متعدد ہدایات جاری کیں۔

انہوں نے زور دیا کہ ڈینگی کی روک تھام اور تدارک کے لیے تمام محکمے مربوط اور عملی حکمتِ عملی اپنائیں تاکہ عوام کو زیادہ سے زیادہ ریلیف فراہم کیا جا سکے۔کمشنر ہزارہ نے اجلاس میں ہدایات جاری کرتے ہوئے کہا کہ تمام اضلاع میں ان ڈور اور آؤٹ ڈور فومیگیشن سپرے کا باقاعدگی سے اہتمام کیا جائے۔

(جاری ہے)

ڈپٹی کمشنرز اور ڈسٹرکٹ ہیلتھ آفیسرز عوامی آگاہی کے لیے سوشل میڈیا، پرنٹ اور الیکٹرانک میڈیا پر پیغامات جاری کریں۔

ہاٹ اسپاٹ علاقوں میں کھلی کچہریوں کا انعقاد کیا جائے جن کی صدارت متعلقہ اسسٹنٹ کمشنر یا خاتون اے سی/اے ڈی سی کریں، جبکہ محکمہ صحت کے نمائندے عوام کو آگاہی دینے اور عملی مظاہرے کرنے کے لیے موجود ہوں۔تمام مرد و خواتین ڈسٹرکٹ ایجوکیشن آفیسرز طلبا کو صبح اسمبلی میں ڈینگی سے بچاؤ کی ہدایات دیں تاکہ وہ اپنے والدین اور گھر والوں کو بھی آگاہ کر سکیں۔ہسپتالوں میں ڈینگی مریضوں کی خصوصی دیکھ بھال کی جائے اور ڈینگی وارڈز کی صفائی اور بہتر انتظامات کو ہر صورت یقینی بنایا جائے۔کمشنر ہزارہ نے اس عزم کا اظہار کیا کہ ڈینگی کے پھیلاؤ کو روکنے کے لیے تمام متعلقہ محکمے اپنی بھرپور توانائیاں بروئے کار لائیں اور مشترکہ کاوشوں سے عوام کو اس مرض سے محفوظ بنایا جائے۔