ثقافتی گیلری کو پراپرٹی ٹیکس نوٹس کے خلاف درخواست نمٹادی گئی

منگل 16 ستمبر 2025 14:45

لاہور (اُردو پوائنٹ اخبارتازہ ترین - این این آئی۔ 16 ستمبر2025ء) لاہور ہائیکورٹ نے اندرونِ شہر میں واقع ثقافتی گیلری کو پراپرٹی ٹیکس کے نوٹس کے خلاف دائر درخواست سیکرٹری ایکسائز کو بھجواتے ہوئے نمٹا دی اور حکم دیا کہ سیکرٹری ایکسائز 45دنوں کے اندر درخواست گزار کو سن کر فیصلہ کریں۔ جسٹس حسن نواز مخدوم اور جسٹس خالد اسحاق پر مشتمل دو رکنی بینچ نے کیس کی سماعت کی۔

(جاری ہے)

درخواست گزار ڈاکٹر اعجاز انور نے موقف اختیار کیا کہ ثقافتی گیلری ایک عوامی اور ثقافتی اثاثہ ہے، جسے پراپرٹی ٹیکس سے استثنی دیا جانا چاہیے۔ ان کا کہنا تھا کہ گیلری کو پراپرٹی ٹیکس کے دائرے میں لانا قانون اور انصاف کے تقاضوں کے منافی ہے۔عدالت نے ریمارکس دیئے کہ متعلقہ حکام اس معاملے پر قانون کے مطابق فیصلہ کریں۔ بعد ازاں، عدالت نے درخواست نمٹاتے ہوئے سیکرٹری ایکسائز کو ہدایت کی کہ وہ مقررہ مدت میں فیصلہ کریں۔