چاند پر زلزلوں کے سبب لینڈسلائیڈنگ ہو رہی ہے، چینی سائنسدانوں کی نئی تحقیق

منگل 23 ستمبر 2025 13:18

بیجنگ(اُردو پوائنٹ اخبارتازہ ترین - این این آئی۔ 23 ستمبر2025ء)چینی سائنسدانوں نے چاند پر زلزلوں کی وجہ سے ہونے والی لینڈسلائیڈنگ کا انکشاف کیا ہے، سائنسدانوں کو چاند کی سطح کے سرکنے کے نئے شواہد ملے ہیں۔یاد رہے کہ چین کا چاند کے جنوبی قطب میں 2035 تک اپنا تحقیقی اسٹیشن قائم کرنے کا منصوبہ ہے، یہی وجہ ہے کہ چاند کی زمین چین کے تحقیقی اسٹیشن قائم کرنے کی کوششوں کے دوران خاصی اہمیت کی حامل ہے۔

چینی ریسرچرز کے مطابق چاند پر 2009 کے بعد سے اب تک 41 نئی لینڈ سلائیڈنگز کا پتہ چلا ہے جو چاند کے اندرونی زلزلوں (مونکویز)کے باعث رونما ہوئیں۔یہ تحقیق سن یات سین یونیورسٹی، فوجو یونیورسٹی اور شنگھائی نارمل یونیورسٹی کے سائنسدانوں نے کی ہے اور 11 ستمبر کو نیشنل سائنس ریویو میں شائع ہوئی۔

(جاری ہے)

تحقیق کے دوران سائنسدانوں نے چاند کے 74 غیر مستحکم علاقوں کی 562 تصاویر کا موازنہ کیا اور ان میں 41 نئی لینڈسلائیڈنگز کی شناخت کی ہے۔

اِن تمام لینڈ سلائیڈنگز میں سے 30 فیصد چاند پر نئے اثرات جبکہ باقی متعدد زلزلوں کے باعث پیدا ہوئیں۔محققین کا کہنا تھا کہ چاند پر زلزلے، زمین کے زلزلوں کے برعکس کئی گھنٹوں تک جاری رہ سکتے ہیں اور سطح پر موجود ڈھانچوں کو نقصان پہنچا سکتے ہیں۔اِن لینڈ سلائیڈنگز کی وجہ سے جو انسان چاند پر مستقبل میں قدم رکھنے کا ارادہ رکھتے ہیں انِ کی زندگی کو بھی خطرہ لاحق ہو سکتا ہے۔