Live Updates

سعودی عرب میں رہنے والے پاکستانیوں کیلئے بڑی خوشخبری

سعودی دارالحکومت ریاض میں گھروں کے کرایے میں سالانہ اضافے پر 5 سال کیلئے پابندی عائد

محمد علی جمعرات 25 ستمبر 2025 18:39

ریاض (اُردو پوائنٹ اخبارتازہ ترین۔ 25 ستمبر2025ء) سعودی عرب میں رہنے والے پاکستانیوں کیلئے بڑی خوشخبری، سعودی دارالحکومت ریاض میں گھروں کے کرایے میں سالانہ اضافے پر 5 سال کیلئے پابندی عائد۔ تفصیلات کے مطابق سعودی حکومت نے مملکت کے دارالحکومت ریاض میں عمارتوں کے کرائے میں ہونے والے مسلسل اضافے کو روکنے کیلئے اہم فیصلہ کیا ہے۔ گلف نیوز اور اردو نیوز کی رپورٹ کے مطابق سعودی ولی عہد کی منظوری کے بعد سعودی حکومت نے دارالحکومت ریاض میں رینٹل پرائس میں استحکام کیلئے نئے ضوابط متعارف کرائے ہیں۔

سعودی ولی عہد و وزیر اعظم شہزادہ محمد بن سلمان کی ہدایت پرعمل کرتے ہوئے ریاض شہر کے لیے رہائشی اور کمرشل عمارتوں کے کرایوں میں سالانہ اضافے پر پابندی عائد کر دی گئی ہے۔

(جاری ہے)

یہ پابندی آئندہ 5 سال کیلئے نافذ العمل ہو گی، اس دوران رہائشی اور کمرشل عمارتوں کے کرایوں میں اضافہ کرنے کی اجازت نہیں ہو گی۔ سعودی کابینہ کی جانب سے منظور کردہ اور شاہی فرمان کے ذریعے نافذ کیے جانے والے ضوابط دارالحکومت میں بڑھتے ہوئے کرایوں سے نمنٹے اور پراپرٹی مارکیٹ میں توازن بحال کرنے کے لیے بنائے گئے ہیں۔

سعودی میڈیا کے مطابق ریاض شہر کے لیے گزشتہ کئی برسوں سے پراپرٹی سیکٹر میں کرایوں میں ہونے والے غیرمعمولی اضافے کا نوٹس لیتے ہوئے سعودی وزرا کونسل نے قرار داد پاس کی تھی۔ قرارداد میں سفارش کی گئی تھی کہ کرایوں میں ہونے والے اضافے کے رجحان کو روکا جائے۔ پراپرٹی جنرل اتھارٹی کو ہدایت کی گئی تھی کہ وہ جائیداد کے مالکان اور کرایہ داروں کے حقوق کا تحفظ کرتے ہوئے جامع حل تلاش کریں۔

کابینہ کے فیصلے پر ایوان شاہی سے بھی پراپرٹی کے شعبے کی صورتحال کو منظم اور فریقین کے حقوق کے تحفظ کو یقینی بنانے کے لیے احکامات صادر کیے۔ اتھارٹی نے جامع انداز میں تمام نکات کا جائزہ لینے کے بعد اپنی رپورٹ پیش کی جسے منظور کرلیا گیا۔ اتھارٹی کی رپورٹ پر عمل درآمد جمعرات 25 ستمبر 2025 سے کرنے کے احکامات صادر کر دیے گئے۔ 5 برس تک پراپرٹی کے کرایوں میں اضافہ نہیں کیا جائے گا۔ کرایہ نامے میں جو کرایہ ( سابقہ یا نئے کرایے ) فریقین نے طے کیے وہ پانچ برس تک برقرار رہیں گے۔ اس کے بعد متعلقہ کمیٹی کی جانب سے نظر ثانی کی جائے گی۔