ناسا نے سورج،زمین اور خلا کے ماحول کے باہمی تعلق کا مطالعہ کرنے کیلئے تین نئے خلائی مشن لانچ کر دیئے

جمعرات 25 ستمبر 2025 17:08

․لاس اینجلس(اُردو پوائنٹ اخبارتازہ ترین - این این آئی۔ 25 ستمبر2025ء)امریکی خلائی ادارے ناسا نے تین نئے خلائی مشنز کامیابی سے خلا میں روانہ کر دیئے، جن کا مقصد سورج، زمین اور خلا کے ماحول کے باہمی تعلق کا مطالعہ کرنا ہے۔غیرملکی خبررساں ادارے کے مطابق یہ مشنز ایک سپیس ایکس فالکن 9راکٹ کے ذریعے امریکی ریاست فلوریڈا میں واقع کینیڈی سپیس سینٹر سے صبح 7:30بجی(مشرقی وقت کے مطابق)لانچ کیے گئے۔

(جاری ہے)

ناسا کے مطابق ہر مشن سورج کی خارج کردہ توانائی، شمسی طوفانوں ، اور خلائی موسم کے مختلف پہلوؤں پر تحقیق کرے گا۔ ان مشنز کا مقصد یہ جاننا ہے کہ سورج کی سرگرمیاں زمین پر موجود زندگی، مصنوعی سیاروں (سیٹلائٹس)، خلا بازوں اور فضائی عملے پر کیسے اثر انداز ہوتی ہیں۔حاصل شدہ ڈیٹا کے ذریعے نہ صرف سورج کے اثرات کو بہتر انداز میں سمجھنے میں مدد ملے گی، بلکہ زمین کے ماحول اور خلائی نظام میں حفاظت اور پائیداری کو بھی فروغ حاصل ہو گا۔